好多人都認為男人食生蠔可以增強床上雄風以及性慾，到底係真唔係呢？一陣就搵專家同大家講解一下。最近喺英國一班意欲落酒吧搵一夜情對象嘅男士統統都冇啖好食，原因只係一個「暗號」。做運動有益身心，研究顯示亦有助男士對抗性能力衰退，而最好就係做帶氧運動。
最近網上流傳一段聲帶相當搞笑，一位聽眾打電話上電台節目，表示有朋友從內地買咗一樽蛇酒，仲話飲完之後雄風強勁，後來一班朋友去到其家中一齊享用蛇酒，之後好奇地將酒樽內條蛇取出來，發現乃係一條塑膠蛇！呢個故事除教訓大家購物要小心，仲令唔少人重新思量一下到底以蛇浸酒是否真有壯陽之效？早前印第安納大學性健康中心嘅負責人Debra Herbenick博士就撰文為大家消除好多有關性慾嘅誤解。首先博士話好多人都覺得食生蠔可以增強性慾以及增強床上表現，但係博士予以否定，話冇乜科學性嘅研究表示呢種軟體生物對男生嘅性能力有特別助益，同伴侶享用一餐有魚蝦蟹嘅簡單海鮮晚餐可能仲有效。女士服避孕藥而導致性慾下降，因為影響體內賀爾蒙水平？博士就話冇根據，有其他研究發現唔少女性服完避孕藥之後性慾反而增強。至於女性更年期出現前會性慾下降嘅問題，博士同樣話冇咁嘅事。
女仔落酒吧會提高戒心，生怕飲醉之後被陌生男人侵犯，就算唔飲醉亦驚會遇到意圖不軌嘅男人對自己不利。之不過，如果同對方飲到一半至知道其不軌意圖，想走又被對方死纏爛打，甚至作出武力威嚇的話，弱質纖纖嘅女仔又可以點做呢？最近英國林肯郡委員會就為保護當地女性免受性侵，因而發起一個名為「#NoMore」嘅運動，參與嘅酒吧內會張貼相關海報，提醒女士如果發現有男士意圖不軌，可以同酒吧內嘅職員講出「Angela」呢個「暗號」，職員就會提供協助，例如幫女方電召的士以及護送女方離開酒吧，甚至係打電話畀有關部門提供更具保護性嘅措施。由於呢個運動成效顯著，令當地女性受到更有效保護，但係班男士們就表示冇啖好食喇。
依家就算幾忙幾難捱都好，一於培養出運動習慣，最好係做帶氧運動，因為有助強身以及對抗勃起功能障礙！葡萄牙波圖大學嘅Andre Silva博士表示男士做帶氧運動對加強性機能有莫大好處。早前搵來505名年齡介乎43至69歲嘅男士協助，佢哋被分為兩組，一組每日都會進行一系列帶氧運動，另一組就生活如常，唔會抽出額外時間做運動。一段日子之後，佢哋就會對自己嘅勃起功能作評分，結果發現有做帶氧運動嘅一組，平均分比冇做運動嘅為高，證明帶氧運動有強壯性機能作用。而博士補充話做帶氧運動男士嘅評分，雖然同有食治療勃起障礙藥物男士嘅評分差不多，但係大家應該未雨綢繆，喺問題未發生之前做好準備。
撰文：賢