「你有壓力，我有壓力」！巴士阿叔事件不經不覺已經十年，港人壓力到今日不但未解決，仲愈嚟愈衰添！近日乜乜「香港快樂指數調查」都係指港人一年衰過一年，乜都唔開心，似乎只有睇四仔先可以換取短暫快樂。之但係壓力又點止得你有，屏幕前嘅脫星咪又係面對咁多生活壓力，即使女神級脫星都話「發達容易，搵食艱難」呀！
上咗位就冇壓力？邊個夠膽講呀！你睇一班女神級脫星，即使退下火線咪又係繼續為兩餐要做做做，唔少N年前紅爆之後引退嘅脫星，人到中年復出拍四仔嘅大有人在，好似Kayden Kross兩年前宣布唔再砌，但係今日你仲見到佢全裸，為乜？咪為頭家囉！講開女神Kayden Kross對脫星界「死唔斷氣」，無知嘅以為佢霸住個位唔捨得放手，又或者為人超貪錢，查實阿妹退出唔拍肉搏戲，一為老公，二為咗囡囡，但係得老公Manuel Ferrara一個人嘅收入，根本支撐唔到頭家，難怪Kayden Kross想專心相夫教女都唔得，退出後仲要同好姊妹Stoya搞個所謂潮流情色網站「Trenchcoat X」，又要做四仔導演，兼喺網站同雜誌寫專欄，睇怕佢咁忙都冇時間湊女。咁都未夠，今年2月，佢同老公Manuel喺YouTube開個Porn Soup頻道，自拍一啲有趣味嘅短片，但收視一般，無他嘅，四仔迷無非都想睇阿妹副偈，得啖笑嘅唔使睇佢啦！
你估Kayden Kross唔知巴打想睇佢自摸呻吟咩？百足咁多爪都搵唔夠錢養家，Kayden都要諗諗計先得。早前佢又有新搞作，就係宣布復出，巴打唔好開心住，Kayden只係Returns to Camming，即係玩視頻咋！今次阿妹同一間叫「Vuier.com」網站合作，喺「ClubKayden.com」即係阿妹好耐冇更新嘅官方網站提供直播視頻節目，玩視頻好出奇咩？平常不過啦！之但係主角係有見樣冇見波嘅女神Kayden玩自摸，最重要係「Vuier.com」講明，百分之九十嘅收入落喺演出者手上，咁大家清楚明白，Kayden Kross為乜要同佢合作啦！
脫星做視頻的確好搵，而另一位同期上位嘅女神Tasha Reign就選擇「貼地」搵食，早前佢接受「AVN」網站訪問，大爆Feature Dancing（即係巡迴夜場跳舞做騷）對脫星有幾重要，當然最終目的都係為錢啦！但以Tasha今日喺美國四仔界地位，佢都堅持喪跳，咁仲有邊個姊妹可以唔使跳呢？Tasha對夜場「跳舞騷」讚到天堂咁正，既可賺取可觀收入，又可當去旅行，更可以零距離同粉絲接觸，了解大眾口味，對於建立個人品牌非常重要喎！咁巴打明白，點解Tasha一年拍咁少四仔，反而成日見佢巡迴美國做騷啦，咪因為一個錢字囉！
搵到錢係咪冇壓力呢？又唔係喎，先前都講Kayden只要同色情有關嘅工作佢都會做，除咗做視頻騷，佢仲幫老公個網絡電視台「manuelferrara.tv」做公關，用盡所有渠道宣傳，唔好誤會，呢個網絕對冇鹹嘢睇，純粹係Manuel哥貪玩鍾意打機，整個直播打機吸引網友睇，正就正在得閒有脫星上台同佢對打囉！至於Tasha Reign都承認，脫星靠一人之力好難搵食，仲要面對各方道德壓力，好似加州公投「Proposition 60」強制色情演員戴套拍片，真係有苦自己知呀！所以女神咁多嘢撈，其實你睇佢好啫！
撰文：祖