男人上到床就好心急，不過有專家話要令女方達到高潮絕對唔急得。搵錢要用腦，最近有一對夫婦搵錢用腦又用身體，以網上直播床上交歡嚟搵真銀。大學生相當大膽，今年又有劍橋大學生發起美臀選舉，男女學生紛紛喺校內拍露臀照參賽。
相信好多平常生活節奏優哉悠哉嘅男士，喺床上都表現得猶如急驚風，唔係話佢哋由前戲到完事都只係幾分鐘貨仔，而係抽送嘅時候只懂得瘋狂扭動下盤猛力進攻，以為頻密又用力咁抽送至可以表達出激情，又以呢種激情去令女方感受到自己嘅雄風，繼而令女方達到高潮！之不過，咁嘅諗法同做法真係錯錯錯！好多研究都指出要令女方喺床上達到高潮，充足且有技巧嘅前戲乃為必要，性學專家Alix Fox表示有幾個要點男士們要注意。首先，刺激G點係其中一個最佳方法，而要有效刺激到呢一點，後進式係一個理想體位。而就算搵到呢個可以令女方感受到強烈快感嘅G點都唔好心急，抽送要放慢節奏，可以嘗試一至三秒先作一次抽送，一來男方唔會咁快洩射，二來可以令女方嘅陰道累積出壓力，抽送間得到嘅快感就會強烈好多。最後，Alix Fox建議大家可以試用震棒玩具，但係就要選擇低頻震動嘅，因為咁至可以有效作出深層刺激。
近年興起好多視頻網站同手機程式，畀大家有多個渠道可以透過網上直播，向公眾分享自己嘅生活實況，亦有唔少人以此作為表演平台。其實呢類程式又真係實用又方便，演出者簡簡單單咁用手機嘅鏡頭就可以拍低自己嘅演出，仲可以一邊同觀看中嘅網友溝通。之不過，演出者當中梗係良莠不齊啦，有人發現曾經有人以此作為援交妹招客嘅平台，亦有演出者以色情表演作招徠添。早前喺英國就有一對夫婦透過網上直播方式嚟吸金，而演出就正正係佢哋赤裸裸於閨房當中享受性愛嘅過程！據英國《每日郵報》消息指出，呢對夫婦收取每位網上觀眾10英鎊作為首次性愛演出嘅收看費用，其後嘅演出就收取約6.4英鎊。據悉，呢對咁出位嘅夫婦一共吸引咗超過380名觀眾畀錢睇佢哋點樣翻雲覆雨，計計埋埋相信已經賺咗幾萬蚊港紙！不過，大家千祈唔好見錢開眼，有樣學樣呀！
唔少大學每年都會有校花、校草選舉，畀大家投票選出自己認為最靚女、最靚仔嘅大學生。大家可能會話：「大學生嘅責任係讀書，花咁多時間選校花校草，不如畀心機專注學業啦！」我哋嘅思想又唔好咁守舊，讀大學咁辛苦，搞少少過癮嘅選舉調劑一下亦冇乜所謂啫！而且呢類選舉已經算係好普通，因為喺英國嘅大學有更加出位嘅選舉，就係劍橋大學最佳屁股選舉喇！最近呢個一年一度嘅選舉再次上演，劍橋大學生喺校內不同地方剝光豬大玩「影后」，將自己引以自豪嘅漂亮屁股以及背影拍低嚟參選，而選舉冇男女之分，故從參賽照片當中除咗女仔嘅屁股之外，亦見到唔少男學生嘅結實臀部。不過，小弟都係唔建議本地大學生參考，因為家陣實在有唔少人對大學生嘅行為不滿囉。
撰文：賢