每當翻開成人漫畫，大家嘅焦點總係落喺女主角個樣靚唔靚、身材好唔好、情慾畫面爆唔爆等，因為呢啲元素先至係成人漫畫嘅核心。講到能夠做足兼有凸嘅成漫家，不得不提鬼月Aruchu，呢啲元素可以喺佢嘅人氣成漫單行本《女僕新娘》中反映出來。
唔少人以為出生於日本宮城縣嘅鬼月Aruchu係男性，查實佢係一位女性成漫家。大家有呢種誤會，主因係佢嘅畫風不但感受唔到少女漫畫風格，激烈嘅床戰場面更往往只會喺男性成漫家嘅作品才找到。不過講到最為人留意嘅，係佢擅長繪畫女性五官，狹長嘅眼睛加上誘人嘅鼻樑，令筆下女角個個都顏值極高，配合前凸後趷嘅火辣身材，可說是成漫迷嘅理想尤物。
早喺讀書時期，鬼月已積極畫漫畫，亦係漫畫社團嘅中堅分子，同時參與唔少漫畫同人團體嘅活動。及至2004年，佢同人氣男性成漫家ZAN組成同人社團「Udonya」，不但合作創作成人漫畫，更喺網上發表作品，開始其成漫創作生涯。憑住社團首部改編自屠龍遊戲《Monster Hunter》嘅十八禁漫畫獲得極高人氣，令社團一炮而紅，更獲得眾多製作商品漫畫同插畫嘅機會。
隨住人氣愈嚟愈高，喺2007年佢獲得喺成漫月刊《COMIC MEGAPLUS》發表成人漫畫嘅機會，同年佢喺另一本成漫月刊《COMIC ZERO EX》發表作品。不過由於佢嘅同人社團工作太忙嘅關係，縱然佢希望能繼續發表漫畫，但礙於時間有限，故此喺2009年6月推出首本成漫單行本《女僕新娘》後，再無推出過其他單行本。
《女僕新娘》收錄咗鬼月出道初期，喺成人漫畫月刊發表過嘅作品，當中包括同名故事《女僕新娘》第1至5最終話、《白蜜姬》、《那之後的【白蜜姬】》、《先生…透光了啦》、《那之後的【先生…透光了啦】》、《宅之夏》、《那之後的【宅之夏】》、《激動的胸部【宅之夏】》、《可變式女僕》及《那之後的【可變式女僕】》多個短篇故事。據作者解釋，「那之後的」嘅原意，係希望能夠以後續方法，令故事變得更加圓滿。另外，書中收錄嘅《女僕新娘》第1同第2話，都係作者重新繪畫嘅單元故事。呢本書最令人印象深刻嘅單元故事，要數《女僕新娘》同埋《白蜜姬》。
《女僕新娘》講述某個早晨，化身成女僕嘅鄰居綠川亞紀羅，嚟搵任職便利店店員嘅男主角久保田鮎太郎，原來對方因為冇錢交租而無家可歸，於是諗住喺鮎太郎屋企暫住。佢睇準鮎太郎係個女僕迷，因此化身成女僕，諗住增加被收留嘅機會。女僕控嘅宅男鮎太郎，見到呢位俏女僕後實在難以拒絕，於是答應收留對方，估唔到化身成女僕嘅亞紀羅，原來既唔識做家務又唔識煮飯，卻相當熱衷於曳曳，一段充滿意外同色情嘅另類同居故事就咁開始。
《白蜜姬》中嘅女主角白姬係某個古代王國嘅公主，樣靚身材正嘅佢深受國民愛戴，卻因為母親嘅怪病而感到煩惱。有晚邪惡參謀藏德去到佢閨房表示，王妃嘅怪病其實係由佢而起，如果想王妃冇事，條件就係要白姬成為佢嘅性寵，白姬無奈之下只好答應。藏德本以為性福無邊，卻估唔到白姬原來係個M孃，結果令佢陷入難以逃脫嘅性愛地獄之中。
漫畫名稱：《女僕新娘》
作者：鬼月Aruchu
出版：CORE MAGAZINE
頁數：192頁
撰文：魂