好多男人都以為密集又帶十足勁度嘅抽送可以令女伴快活無比，之不過調查發現女士們比較鍾意男士招呼佢哋個胸多啲。一念天堂，一念地獄，想女仔鍾意你同討厭你其實只係需要一個印象，咁點先唔會製造一個壞印象呢？一陣就話畀大家知。好多女仔都鍾意同年紀大過佢哋嘅男士拍拖，其中一個原因係可以令佢哋變得更年輕。
中國古時不少朝代都有太監，雖然佢哋已經淨身，但係唔代表佢哋唔能夠尋找婚姻上嘅幸福，唔少仲會娶妻添！吓？冇咗胯下嘅好兄弟都娶老婆？唔怕老婆得唔到床上歡愉，成日都黑口黑面，甚至走去勾佬咩？其實夫妻關係唔一定要有性，只要有愛就可以跨過好多難關，而且要令女方喺床上得到快慰又唔一定單靠抽送。早前美國一個安全套品牌訪問咗5,117名成年男女，其中一個主要部分係想了解女性最鍾意男士「招呼」佢哋身上邊一個部分，最多女士回應係胸部！34%受訪女士表示最享受男方撫摸同錫佢哋嘅胸部以及乳房，仲話男方咁做至可以令女方感受到被愛喎！其次就係頸項，28%受訪女性表示頸部屬於相當敏感嘅部分，仲話男方要令佢哋得到快感一定唔可以忽略錫錫佢哋條頸。第三就係屁股，15%受訪女性認為屁股係一個男方值得花時間同心機去「招呼」嘅地方。各位男方喺前戲嘅時候千祈唔好忽略呢三個地方喇！當然，如果嚟個雙管齊下就更好啦！
出嚟社會工作咁多年，小弟明白予人一個良好印象相當重要，而好印象來自得體嘅談吐以及整潔嘅外表等方面。要令女仔鍾意你亦係一樣，我相信冇幾多個女仔會鍾意一個外表污糟嘅男仔囉！成功給予女仔一個好印象，發展感情自然水到渠成，若然只係想發展一夜情亦然！約會專家Louanne Ward就提醒大家5大破壞良好印象嘅例子，希望大家留意，以免破壞一段大好姻緣以及一次開心嘅一夜情。專家話通過調查了解到最多女仔唔鍾意男方扮有型，因為咁樣會給予對方一個囂張又沙塵兼睇人唔起嘅印象，女仔睇唔起人就好地地，畀人睇唔起就梗係唔鍾意啦！其次係笑容喇！如果男士自問牙齒唔夠整齊、唔夠雪白又唔夠乾淨，就唔好笑到露晒齒喇。第三就係成日睇手機，咁樣做會令女仔覺得你唔專心，甚至唔重視女方，更加會思疑你同時溝緊其他女仔。第四係唔可以表現過份自信，咁樣又令女仔覺得你扮晒嘢唔夠親切。最後就係個人衞生，相信男士們喺約女仔嘅時候都會執靚個樣，呢方面應該冇乜問題。
小弟近期飽受情傷之後，為求得到慰藉，成日向身邊嘅朋友表示急於搵個女友，而佢哋都叫我唔好咁心急，男人以事業為重，到事業有成，四五十歲一樣唔愁冇女伴，係咪真呀？早前喺日本就有一個相關調查，發現逾半受訪嘅二十來歲女仔，鍾意搵年紀大過佢哋十年以上嘅男人結婚，最大原因係班女仔覺得呢個年紀嘅男士較有風度同禮貌，唔會好似後生仔咁花花弗弗，戀愛時嘅不安感大為降低，另一方面喺床上亦夠斯文以及有技巧。其次係女仔陪同年長男士出席聚會時，男伴身邊多為其同輩，女仔處身其中就顯得更年輕更可愛，容易成為矚目點。第三個原因相當實質，女仔同年長男士出街嘅時候，由於男方工作多年有番咁上下經濟基礎，通常都可以完全為女方付出費用，加上男人愈年長就愈要面子，女仔想畀錢都會被拒絕。照咁睇嚟，我都係努力工作，等事業略有所成要去溝女較有勝算喇喎！
撰文：賢