正所謂男人不壞，女人不愛，有專家話箇中原因係女人有探險心態。上床要注重安全同衞生，而要保障男女雙方嘅身體健康，上床前後有幾個重點需要多加注意？一陣就話畀大家知。
如果大家訪問一百個女仔，問佢哋鍾意一個點樣嘅男仔，佢哋都會答理想對象嘅條件，除咗有車有樓有學識、高大靚仔之外，個性善良、有同情心、考順父母、尊敬師長、愛護家庭、愛錫小朋友，成日都會笑，識得氹佢哋開心亦係必要條件。小弟溝過咁多女仔，每次約會我都能夠氹佢哋笑得開心燦爛，之不過，倒頭來小弟都被視作小丑，真命天子始終都係一個令女仔流眼淚嘅浪子！認真要慨嘆一句天意弄人，人間正道是滄桑呀！點解會咁呢？早前一個澳洲調查顯示大部分女人都會選擇同性格叛逆嘅壞男孩拍拖，更加有39%受訪女性表示即使預知呢段感情令佢傷心欲絕，亦會選擇同壞男孩一齊。心理學家Matthew Hornsey博士表示咁係因為女性內心充滿探險心態，亦享受同對方談及觸及界線話題嘅談話過程。專家話作為好男人都唔使傷心，因為壞男人喺女仔心目中只係屬於短期關係對象，「跑長途」都係好男人勝出機會大啲！畀班壞男人食晒頭啖湯，玩完後先輪到我哋好男人，我寧願做個叛逆男兒多啲囉！
正所謂小心駛得萬年船，除咗機器要做足保養工夫先可以延長壽命，人類亦一樣要好好保養身體，多做運動、注重健康飲食、戒除食煙飲酒等壞習慣，男士們如果想延長性功能壽命，當然亦要好好保養自己嘅命根啦！不過，將心比己，自己身體好，亦都希望女伴一樣有健康嘅身體，咁大家至可以盡情享受床上歡樂嘛！美國婦科專家Leslie E. F. Page建議大家要注意幾點房事後嘅保養，第一係完事後唔好用沐浴劑嚟清潔下陰，因為做完愛之後，女性嘅下陰處於興奮狀態，皮膚亦容易受到損傷，呢個時候用沐浴劑清潔會引致陰道乾燥以及敏感反應。第二係完事後小便，可以將陰道內嘅細菌沖走，保護陰道健康。第三切忌做完愛後即刻着緊身褲，正如第一點所講，完事後嘅下陰容易受損傷同感染。另外，專家亦提供兩個事前準備以確保女性嘅下陰健康，第一係唔好剃毛做白虎，因為陰毛對下陰有保護作用，否則容易喺交歡時令細菌進入陰道機會增加。第二係唔好飲太多酒，酒有利尿作用，飲得酒多小便次數增加，自然令陰道分泌減少，上到床就會發現陰道乾乾哋，缺少分泌作潤滑，激戰時感到痛楚機會上升之餘亦增加受損機會。
撰文：賢