好多調查都顯示日本男人愈來愈唔鍾意做愛，因而令情侶酒店面對出租率低嘅困境。坊間有好多與性相關嘅都市傳聞，到底係咪真呢？男人上床為咗尋開心，女人又係咪咁諗？
因為土地不足嘅問題，年輕人想搞嘢都冇地方。「爆房難」成為一個社會現象，由於置業難，年輕人多與父母同住，與愛人情到濃時唔通喺屋企上演激戰咩，惟有去爆房！之但係，每逢星期五六日晚上7點過後，想爆房？唔該排隊啦！然而，呢個情況喺日本就剛剛相反，當地男女要爆房可謂易如反掌！據業界人士表示由於日男變得草食化，唔想溝女亦唔會爆房，加上除咗爆房之外，情侶仲有好多廉價娛樂活動，因而令情侶酒店出租率只得4成！為咗吸引客人幫襯，業界人士話會提高服務質素及加入新玩意，但係佢哋對前景唔樂觀，有部分喺2020年東京奧運之前將情侶酒店改造成正規酒店，以滿足奧運舉辦期間嘅住房需要。
自古以來，男女之間嘅性事都令人產生無限遐想，同時大家對性事充滿神秘感，可能係因為大家對性事一知半解，繼而產生好多與性有關嘅傳聞，例如男人一滴精等於十滴血，當然大家上網一查就知道呢個說法並唔正確啦！最近英國新聞網站「Daily Star」搵出多個性愛謬誤同大家解釋一番，其中一個就係交歡次數多係咪會令女性嘅重要部位變得又鬆又闊，性學專家Sari Locker博士話性交係唔會令女性嘅下陰色澤、外形、大小有所改變，即使頻密交歡亦都一樣。而另一個謬誤係外國人認為男人腳掌愈大，下體則愈大，上年英國做過相關調查，結果發現冇咁嘅事。至於女仔喺初夜是否一定會「落紅」呢？專家話女仔喺做運動，以及放入衞生棉條嘅時候可能早就令處女膜穿破而不自知，故初夜就唔會落紅喇！
男人千方百計溝女，好多時都只不過係為咗上床，冇良心嘅甚至「中出即飛」。將心比心，男士們有冇諗過女人係因為鍾意你，先同你上床呢？呢份心意難道感動唔到你咩？日本兩性關係網站「Menjoy!」早前綜合咗唔少心理學專家以及女性嘅意見，指出女性肯同男人上床其實背後藏着唔少真相，第一個係考慮到將來，專家話女仔除咗感情上需要男人，喺經濟層面同精神層面都需要男人去滿足，喂！經濟層面呀！明白未？第二個係女仔覺得同男方嘅性關係愈長久，感情愈加深，呢方面男人剛好相反，做得多只會令男人覺得悶囉。第三個係上床令女性感到幸福滿瀉，對男方感情加深，原來係交歡時大腦會產生出被稱為「幸福激素」嘅「5-羥色胺」。第四就係女仔會刻意扮靚、瘦身以增加自己喺長久伴侶心目中作為床上對手嘅價值，換言之對性愈來愈重視，呢方面男人又係相反，第一次得手之後，第二、三、四次多數已經變成例行公事。
撰文：賢