命根大小係好多男人煩惱嘅問題，不過想溝女成功唔一定要天賦異稟，因為調查發現女人比較注重男方嘅個性多啲。好多港男都希望識到日本女仔，甚至娶佢哋做老婆，不過事前要三思嘅除咗係溝通問題，仲要考慮埋體力，因為調查顯示日本女仔極鍾意做愛！長期對住電視、電腦螢光幕對人體有唔少影響，除咗影響睡眠質素，亦會影響精子數目！
所謂先散羅衣後敬人，出街當然要執靚個樣，同女仔出街更加要花成粒鐘扮吓靚，Gel頭、熨衫、剃鬚。以個人經驗嚟睇，約女仔執靚個樣係重要，但係生得高大靚仔更加重要，腰纏萬貫則至為重要，唔係咩？咁諗法其實錯晒！高富帥雖然受女仔歡迎，之但係女仔真正需要嘅唔係呢啲，亦當然唔係巨而長嘅陽物！醫療網站Superdrug Online Doctor早前透過網上問卷訪問咗1,712名美國人及英國人，從中睇吓女士們考慮搵一個長期伴侶嘅時候，認為男方邊一個條件最為重要，結果外表、學歷、專業資格以及收入，分別排二至五，可以睇得出英美女士唔係咁重視收入，自問唔係有錢嘅非專業人士不妨考慮去當地搵老婆喇！咁咩條件至係最重要呢？原來係個性，佢哋會觀察對方嘅人品、談吐、性格同幽默感，以決定係咪同呢個男仔有進一步發展，英美女性同港女真係有好大分別喎！
最近小弟認識咗個新朋友阿乙，無論身高、樣貌、收入都相當平凡，無甚突出之處如你如我，但係佢嘅老婆就不平凡喇！乃日本女仔，樣貌相當唔錯添！阿乙每次提到佢老婆都眉飛色舞，搞到我又羨慕又妒忌。之不過，睇完由日本網站AM總研進行過嘅一個調查結果之後，我已經唔會再將娶日本妹做老婆當係人生第一志願，同時亦向阿乙送上無限祝福，希望佢喺往後漫長嘅日子當中身心康泰！呢個調查訪問咗1,844名日本成年女性，為佢哋喺2015年嘅性生活作出總結，結果發現有50.4%受訪女性曾經背住伴侶偷食！雖然比率幾高，但係仲有近半數人冇偷食吖！咁都唔代表佢哋嘅伴侶能夠安心，因為調查顯示出42.9%女性「絕對喜歡」做愛，亦有41.4%表示「非常喜歡」做愛，做佢哋嘅男伴真係少啲體力都唔得囉！
近期身邊好多朋友都愛上做運動，特別係對跑步情有獨鍾，而小弟一生最敬愛嘅阿哥更愛跑步愛到幾乎走火入魔，每日都要跑完8至10公里先返屋企。阿哥一向影響得我最深，見佢愛上跑步之後成個人健康咗，身材弗咗，更重要係小弟嘅夢中女神鍾情瘦削男仔，搞到我都想學阿哥咁養成跑步習慣，而睇完美國呢個研究結果之後，更加令我唔敢再做宅男，一日到黑對住電視、電腦嘅螢光幕喇！美國一本醫學雜誌《American Journal of Epidemiology》早前邀請到1,200名身體健康嘅成年男子幫手研究，將佢哋分為兩批，一批每日需要睇5小時電視，另一批則如常生活而睇電視嘅時間少於5小時，結果發現前者嘅平均精子數量為1億4百萬條，後者則為1億5千8百萬條，兩者精子數量相差近三分之一咁多！不過，研究負責人表示未有證據顯示螢光幕對精子數量有直接影響，兩者精子數量有咁大差距，好可能係每日睇電視5小時嘅一組，因為花太多時間睇電視而缺少運動所致，運動原來咁重要，咁我都快啲去跑步先得喇！
撰文：賢