大家知唔知美國色情電影嘅黃金時代係幾時？答案就喺上世紀70至80年代。呢個美國色情電影嘅高峰期中，不但有大量各類型嘅電影湧現，亦造就至今仍視為傳奇嘅經典艷星。不過講到當中被公認為黃金時代最迷人嘅艷星，莫過於紅極一時，卻如流星般劃過嘅Shauna Grant。
原名Colleen Marie Applegate嘅Shauna Grant，喺1963年5月30日於美國加州出生，因父親工作關係，全家移居至明尼蘇達州嘅一個小鎮Farmington生活，而Shauna就喺呢個小鎮成長。1981年高中畢業後，佢先後做過收銀員及文員，同年染上濫藥不良嗜好，翌年更離家出走，同男友Mike Marcell走咗去洛杉磯。一個月後，Shauna見到模特兒公司World Modeling Agency招聘寫真模特兒，於是膽粗粗去面試，憑住鄰家女孩嘅氣質，加上玲瓏浮凸嘅身材，即時獲得取錄，其處女寫真由傳奇攝影師J. Stephen Hicks親自操刀，甫推出立即引起極大回響，Hicks亦大讚從未見過一個好似Shauna咁淳樸嘅女孩。自此以後，Shauna人氣急升，喺各大成人雜誌都見到佢嘅身影，而成名之後佢同男友分手，及後佢認識咗色情電影製片人Bobby Hollander，從此展開色情電影演出生涯。
Shauna嘅處女作《Virginia》上映，出現觀眾排隊買飛入場嘅盛況，因而被傳媒封為「色情王后」。之後佢演出過《Suzie Superstar》、《Flesh and Laces》等多套作品，而片酬亦大幅上升，從當初每日人工300美元，增加到1,500美元，生活變得愈嚟愈奢華，出入以豪華轎車代步，又入住豪華酒店。雖然佢來片不拒，但係堅持唔拍女同片，即使有片商以超高片酬利誘佢演出亦不為所動。
出道短短一年，Shauna已演出超過30套色情電影，並且多次喺成人電影頒獎禮中獲得提名。正當佢嘅事業攀上高峰時，因誤交損友而染上毒癮，嚴重影響佢嘅演出，遭到電影公司同導演抨擊，結果佢喺1983年宣布退出色情界。由於慣咗奢華生活加上毒癮影響，佢只好投靠毒販男友Jake Erlich。及至Jake被捕後，雖然佢嘅父母表示願意資助佢讀大學，但佢認為事情已唔可以返轉頭，因此喺1984年重回色情電影界。1984年3月23日佢喺寓所內自殺，一代色情王后就咁結束人生，而佢嘅經歷喺1988年被拍成電影《Shattered Innocence》。
撰文：魂