小林瞳頂級傳說

脫出名堂

喺1963年9月2日出生於日本東京嘅小林瞳，未投身AV界前本身係一位脫衣舞孃，憑住清純氣質加上青春魅力，令佢喺脫衣舞界頗具名氣，更被星探睇中搵佢拍AV。喺1985年以藝名松本香織演出處女作《心跳‧香織19歲》及同名全裸寫真集，正式踏上AV女優生涯。一個月後，佢改名小林瞳，並推出第二套作品《禁斷關係》，喺片中佢展現出青春活力，演出床戰時更七情上面，演技發揮得淋漓盡致，從此奠定佢喺AV界嘅地位。

有AV文化研究專家指，如果要研究AV文化嘅話，一定唔可以漏咗小林瞳，足見佢嘅影響力有幾咁大。其後推出嘅作品《色情》、《用口誘惑》、《溺愛》、《我想看見》等，見到小林瞳嘅演技愈嚟愈成熟，好多內心戲都做得好好，難怪銷量成績理想，更被視為經典AV作品。

艷名遠播

不過講到小林瞳嘅代表作，則係喺1987年推出，並遠赴倫敦拍攝嘅《熱狂 in LONDON》、《失神 in LONDON》及《喝采 in LONDON》呢三部曲。須知道當年嘅AV產業雖然發展迅速，但講到要去外國取景拍攝卻唔多，故此呢三部作品都大賣！除咗喺AV界發展外，小林瞳亦進軍寫真界，繼處女寫真集後，推出過《複合過去》、《茉莉花》、《魔性》等作品，全部都獲得極佳銷量。此外，佢又擔演粉紅電影《瓶裝地獄》及《奧戲快感艷》，艷名一時無兩。正當佢嘅事業處於巔峰期，喺1989年佢宣布同事務所嘅社長結婚，並且收山唔拍AV。

不過，喺1991年佢出返嚟做老本行當脫衣舞孃，及至1998年回歸AV界，並推出《背德之絆》，雖然佢已屆熟女之齡，但係艷光不減，獲得AV迷大力支持，直至2003年12月推出《小林瞳 FINAL》之後，正式宣告引退。有人計算過小林瞳共演出超過30套AV，總銷售額高達78億日圓（約5,900萬港元），傳說之名當之無愧！雖然佢退出AV界，但仍有推出全裸寫真，並參演電視劇，最著名嘅係《特命係長 只野仁》，據聞由2009年開始佢喺銀座嘅高級俱樂部擔任媽媽生至今。

撰文：魂