喺11月日本AV界會有大型盛事舉行，就係「AV OPEN 2016」，相信當日一如以往咁群情洶湧，現場插針都插唔入，想搵女優影相都幾難，但係唔使怕，因為我哋可以參加女優攝影會同握手會，大家係咪好有興趣呢？現搵嚟兩大女神三上悠亞同大槻響以性感又搞笑嘅方式，教授攝影會攻略大法！
日本係好多港人嘅熱門旅遊地方，景點多而優美，環境又整潔，更重要係有好多地方適合作為AV迷嘅朋友去遊玩一番，真係？梗係啦！好多AV女優都會定時定候舉行攝影會同握手會，大家去到日本又點可以唔參加，親身同AV偶像見面同合照呢！之不過，近年除咗有唔少內地遊客喺遊日時鬧出違規事件，部分港人亦因為唔了解當地嘅文化及規矩而鬧出不快事，想參加AV女優攝影會同握手會，當然要先清楚了解一下當中嘅宜忌啦！最近專門提供AV女優活動情報嘅網站「av-event.jp」，請來兩大AV女神三上悠亞及大槻響拍攝短片教授攝影會攻略，大家喺YouTube以關鍵詞「EVELT イベルト」搜索一下，就可以搵到由兩位女神演出嘅鬼馬攻略片段喇！
呢段片一共有6段咁多，主要由三上悠亞演回自己，即係知名AV偶像，性感打扮當然唔少得啦！至於大槻響就蝕底少少，扮演樣衰衰嘅AV迷，專門喺活動中搞搞震又手多多，次次都搞到悠亞嬲嬲豬，對佢嘅行為作出警告，又估唔到大槻響演得幾搞笑！例如喺《檢索編》中，三上悠亞會教大家點樣用手機上網搜尋日本不同地區即將上演邊一個女優嘅攝影會，而喺《攝影編》中，悠亞提醒大家上台同偶像合照嘅時候，千萬唔可以手多多去摸偶像隻手，亦唔可以攬腰，不過偶像摸你同攬你就冇問題。當然，相信所有AV迷都希望可以畀女優摸多啲，行為再「過火」少少都樂於接受啦！
相信大家對於參加女優嘅攝影會以及握手會都相當有興趣，而睇完大槻響同三上悠亞嘅攻略片段，應該對當中宜忌有深入了解，定會計劃下次遊日嘅時候，點都要搵個女優活動參與一下，咁至算不枉此行。由於網站「av-event.jp」設有鎖區功能，喺香港上網係睇唔到呢個網，但係身處日本透過當地網絡則冇問題，遊日時不妨先探索呢個網站。之不過，如果大家心急想早少少計劃一下參加女優活動亦有辦法，就係Click上官方網站，裏面會顯示部分女優嘅活動資料，相信對大家有幫助。
網址：https://twitter.com/evelt_official?lang=ja
撰文：賢