拍一套四仔最貴係脫星嘅片酬，如「蜘蛛女」Bonnie Rotten前後門齊開片酬約16,000美元，加埋其他雜費，製作費約10萬美元。最近有套叫《The Marine》上畫，製作費過百萬美元，唔好以為投資咁多就好堅噃，只不過係一套「愛情動作片」，唔使睇市場反應，細佬都肯定佢蝕到入肉囉！
講真製作費多少好難界定高低嘅，要視乎片廠大小，係咪為攞獎而拍，以及起用乜嘢脫星等因素而定，例如2005年片廠Digital Playground率先惡搞荷里活大電影《魔盜王》，搵嚟多位脫星如Jesse Jane、Teagan Presley及Janine Lindemulder等上陣，片名叫《Pirates》，製作費高達100萬美元，採用高清畫質拍攝，四仔碟售價70美元，之後仲推出埋原聲大碟，喺四仔界實屬罕見，而呢套四仔叫好又叫座，喺各大頒獎禮奪得唔少獎項。3年後，推出續集《Pirates II: Stagnetti's Revenge》，報稱製作費高達800萬美元，可惜反應麻麻，結果蝕晒大本！
業界見到Digital Playground咁慘慘豬，對投資拍攝四仔都好謹慎，唔係必賣作品一定唔會揼本，起碼要好似「惡搞大導」Axel Braun嘅四仔先有得傾呀！而早前有新四仔廠EliteXFilms推出一部報稱花咗過百萬美元製作費拍攝嘅「四仔連續劇」，呢個消息震驚四仔界！
呢套「四仔連續劇」片名一啲都唔意淫，更同色情無關，叫《The Marine》，據官方表示係一套「動感」十足嘅四仔，除咗必有嘅床上動作之外，其他場面都係真槍實彈，唔係打交，就係揸槍追殺對方，係咪好荷里活電影Feel呢？官方話搵嚟經驗豐富嘅荷里活攝影師Steve Jones操刀！唔識佢？正常吖，連上網起佢底都搵唔到呢位大哥嘅資料，所以細佬懷疑Steve Jones係假名，或者唔想畀人知佢「降呢」拍四仔啩！
不過，亦好難令人相信EliteXFilms花過百萬美元拍攝囉，雖然新聞稿講到製作有幾勁，如1,080p畫質，仲可以睇4K，又5.1立體聲，遲吓仲有VR版本等。但係呢間廠喺2014年先成立，到今日先有四仔作品派街，即是話呢部《The Marine》係頭炮作品，咁都冇問題，問題係班女唔多掂囉！EliteXFilms淨係話《The Marine》係四仔連續劇，但無講到有幾多集，想睇嘅只可以去官網買嚟睇，咁四仔迷最關心梗係囡囡啦，但講完保證你會失望，全片只得三件女登場，最勁嗰個係Tasha Reign，其次係中女Dana DeArmond及90後嘅Daisy Haze，反而男優因為要肉搏又要隻揪，件件都咁大隻，唔通係想吸引更多女觀眾？
撰文：祖