享受閨房之樂係一件愉快嘅事，之但係有4種床上招式切忌玩得太激，否則樂極生悲。夏天喺街上見到好多打扮性感嘅靚女，但係男士們未必會興奮，皆因美女身上散發出令男人厭惡嘅味道。情趣玩具慰藉好多單身男女，不過係咪每個用家都能夠獲得滿足呢？
床上招式千奇百怪，好多男士都想同女伴試盡不同招式，增加樂趣及新鮮感。之不過，好多招式需要體力同技巧互相配合，掌握得唔好除咗會出現反效果，更加有機會傷及身體同珍貴嘅命根兒。最近有一個來自巴西嘅調查，列出當地最常見導致男士下體受傷嘅床上招式，大家不妨參考一下，避免意外發生。當中嘅招式包括騎乘位，調查負責人話騎乘位幫助女方更容易達到高潮，但事實上唔係好多女仔能夠熟練地騎乘，故不時發生弄傷命根嘅意外。另一個常見受傷招式係龍舟掛鼓，小弟覺得呢招難度極高，男方將女仔成個抬起嚟玩，受傷機會高絕對唔出奇。第三個係後進式，男方抽出命根時，再猛力一挺卻瞄錯位置令命根受傷。最後一招就係背面騎乘，調查負責人話呢招傷根又傷身，事關使出呢招時女方背住男方並按住男方嘅膝頭借力，騎乘時有機會出現騎錯位傷及命根，而女方將身體重量集中喺男方嘅膝頭上，容易令膝頭帶來傷害。
四季之中小弟最鍾意夏天，因為令人心情變得奔放又熱情。不過，好多男人就唔多鍾意，佢哋話最怕天氣炎熱搞到一身汗，即使喺街上見到好多性感美女都係咁話。早前喺日本進行過一項調查，希望了解一下男士們喺夏天最怕見到女仔邊一種行為或情況，結果排第三位係女士腋下出現濡濕一片，咁又係，睇見到覺得唔衞生又不雅。排第二位係調校冷氣溫度，因為男士怕熱而女仔怕凍，經常為咗調校冷氣溫度而發生爭拗，男士們通常都爭輸，梗係討厭啦！排第一位就係噴止汗劑，因為止汗劑嘅香味同汗味混埋一齊，產生出「別樹一格」嘅異味，有受訪男士仲話覺得呢種味係來自魔界添呀，足見有幾難頂。
情趣玩具五花八門乜都有，令好多男女都受惠，享受無比快慰！早前網站Men's Heath透過網上問卷調查，訪問咗超過500名成年男女，當中有66%表示曾購買過情趣玩具，比率都幾高。而呢個調查目的係希望集中了解男性用家，結果顯示呢班男用家多數都係購買仿真矽膠J杯，受訪者表示使用J杯再加上特製潤滑劑，可以享受到最強快感。然而，針無兩頭利，唔少男用家表示用完之後最怕就係要清洗乾淨，亦有人話喺清洗過程中覺得自己好可憐。另外，有人話玩情趣玩具冇心靈上嘅連繫，亦冇得進行錫錫同愛撫作為前奏，令人感受到強烈嘅空虛感！知就好啦！仲唔快啲出去溝女！
撰文：賢