雖然面對危險可以激發潛能，好似小弟咁，截稿前一小時都仲懶懶閒，一畀人催稿就即刻爆發小宇宙係咁寫。之不過，咁做唔係萬試萬靈，長此下去分分鐘搞到心臟病發。其實要喺床上享受快感亦一樣，唔一定要一下子將潛能爆發，以療愈力十足嘅溫柔方法慢慢將色心勾起，冇咁大壓力，自然可以發揮得更好！今日介紹畀大家嘅寫真集以及情色工具書就能夠給予大家充足嘅治愈力喇！
坊間有好多治療肌肉痠痛嘅方法，例如用熱毛巾外敷，或用紅外線燈照射等等，不過如果要治療疲乏嘅心靈又可以點呢？咁就當然係欣賞日本寫真界明日之星佐野雛子嘅寫真啦！佐野雛子青春俏麗，正統派面孔美艷度比得上天后原幹惠以及小林惠美。至於身材方面，佐野雛子除咗體態苗條婀娜，前凸後趷，仲有白滑而水潤嘅優質肌膚，令呢副胴體吸引力直線上升！
寫真集《ひなこ、水着、3ねんぶん》就係雛子嘅最新力作，亦係佢相隔兩年之後推出嘅第二本寫真集，為隆重其事，特別去到熱情洋溢嘅夏威夷取景拍攝，而雛子喺景致優美嘅海灘上，將其迷人胴體盡情展露，甜美笑容伴以燦爛陽光，化成一股窩心暖意直透觀眾內心，頓覺通體舒暢！
書名：《ひなこ、水着、3ねんぶん》
售價：約HK$184
兩性關係專家經常講，男女放工返到屋企，最好嘅溝通方法莫過於幫對方按摩，用身體嚟感受對方嘅愛，而坊間亦有唔少關於呢個題材嘅著作，不過好多都係英文，叫人點睇呀！唔緊要，呢本由日本作家Pampero所著嘅《雙人調情按摩術：幫另一半紓壓、愛撫的50個絕招》，大家絕對睇得明。呢本書嘅宗旨在於喚醒自身嘅魅力，並透過按摩燃起對方嘅激情，加上溝通方法以達至減壓同生活融洽嘅目的。共分為兩個部分，第一個部分主要講述各種按摩嘅方法，當中包括泰式按摩、指壓及活膚按摩，同埋全身油壓按摩，呢3種按摩方法能助身心變得舒暢之餘，透過體會身體結構，從而令壓力及疲勞盡消；第二個部分則介紹4個特別需要留意嘅愛撫區，亦係按摩時要留意嘅重點。據作者講，透過官能撫摸可以引領大家到達真正快感嘅世界。當然，睇字不如睇圖，書中以圖片介紹方式，一步一步教導大家應該點樣按同點樣做，縱然多達50招按摩方法，大家都唔使擔心面對大大個字海，都唔知點樣入手啦！
書名：《雙人調情按摩術：幫另一半紓壓、愛撫的50個絕招》
作者：Pampero
譯者：何姵儀
售價：約HK$88
撰文：賢、魂