拍拖最重要係男女雙方互相遷就同配合，而喺床上想有更高嘅快感享受亦一樣要好好配合，唔知男士對呢方面點睇呢？提到上床，唔少男女喺婚前都有不少性伴，咁究竟性伴對婚姻關係有咩影響？傳說中有採陽補陰之術，事實上專家亦表示女士們適當地做愛，個樣都會靚啲。
由於小弟自小就涉獵中外鹹片，特別係對日本AV略有研究，所以身邊好多朋友都會問我最近有邊個AV女優最弗、表現最出色。其實，小弟睇鹹片都唔只為咗自己開心，亦希望令未來伴侶開心，點解？因為睇鹹片可以從中學習床上技巧囉！相信唔少男士嘅諗法亦與小弟一樣，之不過女士們又有冇咁諗過呢？有冇考慮過提升床技令男伴滿足呢？一個來自日本嘅研究，訪問咗一班男士，發現受訪者當中有22%表示唔滿意女伴嘅床上技巧。咁邊方面令佢哋覺得有問題呢？最多男士表示女伴嘅身體太硬，交合嘅時候動作唔夠流暢，有時仲唔知點搞好。其次就係男士要向女方多番講解喺床上如何配合，要花咁多口水，因而搞到興奮心情減弱晒。另外，亦有男士不滿女方嘅反應太誇張，叫到好似劏雞殺鴨咁，反應係要有，但係叫到鬼殺咁嘈，真係隨時嚇到龜縮呀！
隨時代進步，大家嘅思想愈趨開放，相信大家都覺得家陣嘅年輕人喺思想同行為上都同其上一代有好大分別，就以男女感情為例，現時年輕人拍拖好隨便，感情快嚟快去，甚至日日唔同伴侶，邊似我哋呢一輩咁，為咗追女仔要花盡心思。美國猶他州大學針對現時嘅年輕人以及其上一代進行研究，希望了解一下兩代人嘅性伴數目及婚姻關係，結果發現20至30多歲嘅年輕一輩，男仔方面嘅婚前性伴數目平均為11.7個，女仔則有7.7個，而50至60歲嘅上一代人當中，男士有8.6個性伴，女士則只有3.7個。負責呢項研究嘅專家話婚前性伴愈多，對婚後感情關係愈有影響，因為年輕一輩喺婚後與伴侶做愛次數，每月少於5次，而上一代雖然婚前性伴少過佢哋，但係婚後每月做愛次數就多於6次，表示婚後夫妻關係比較穩固。
早一陣子，小弟成日畀人話面色灰暗，精神又唔多好，成個人都謝晒咁款，我自問身體健康，點解會咁呢？有朋友一語道破，話我一定係太耐冇拍拖，冇愛情滋潤至會搞成咁。又講得冇錯，喺冇拖拍嘅日子，我個人好似失去人生方向一樣，為自己嘅身心着想，都係要快啲搵個對象拍拖喇。其實唔單止男人要愛情滋潤，女人亦有需要，最好有埋性愛嚟滋潤添！性愛健康專家Samantha Evans早前撰文指出，女士們有適當性愛對身心健康好重要！佢借用一個訪問咗15,000人嘅調查數據表示，每周做愛2至3次嘅女性群組，比起冇做愛嘅一群，聲稱自己生活愉快嘅比率高達55%！佢仲話做愛可以促進血液循環，令女士們膚色紅潤，膚質亦會大為改善。做愛仲可以提升女士們體內嘅催乳素水平，令睡眠質素大大提升，瞓得好自然人都精神啲，容光煥發啦！
撰文：賢