生得高大嘅男士對女仔有相當吸引力，有調查發現身高超過5呎10吋嘅男士性伴較多添。世事無奇不有，原來「走後門」都有機會令女方懷孕，點解咁奇怪呢？好多男人都幻想同AV女優上床，不過如果女伴喺床上變得AV化，佢哋又接唔接受呢？
小弟以前好鍾意踢波，由於我身材健碩，身位相當唔錯，而性格又保守，加上唔多鍾意走動爭位，故最喜歡就係踢後衞。之不過，隊友嫌我身材生得矮，面對對方高大嘅前鋒爭頂頭槌嘅時候相當輸蝕，遂叫我改踢前鋒。老實講，我係雙槍將，閱讀球賽能力都唔錯，可惜又係輸蝕在唔夠高，搞到隊友只可以地面交波，生得矮真係好蝕底！事實上，喺溝女方面都比較輸蝕，美國查普曼大學訪問咗超過6萬名男士，計一計佢哋嘅身高以及性伴數目，呢班男士平均身高為5呎8至10吋，結果發現身材高於呢個平均身高嘅男士，其性伴數目比低於平均高度嘅男士多三分之一，專家David Frederick話原因係自原始人時代開始，女人視高大嘅男性能夠保護佢哋，亦帶住優良嘅基因喎。不過，專家亦提示矮仔們唔好傷心，因為現代女性其實都係睇性格嚟揀伴侶，身材高矮其實只係次要條件。
男士係貪心嘅動物，得一就會想二，有女友或老婆都會搵小三，就算冇實際行動都會對其他女仔充滿幻想。而女人要綁住男人個心，除咗要抓緊佢個胃，識得整美味菜式同煲靚湯之外，最緊要喺床上搞多啲花樣。不過，有時男方又會好過分，玩完前面又想玩後面，試吓突破禁忌走後門。暢遊後花園呢種玩法我唔反對，不過要注意安全，同時亦要注意適當使用潤滑劑。另一方面，仲要小心會搞大女方個肚，吓？走後門都會大肚？泌尿科專家Brian Steixner就話如果女子天生泄殖腔異常，生殖系統同直腸連接埋一齊，走後門就會令精子能夠進入陰道導致懷孕。雖然喺25,000個女子當中才出現一個案例，但係唔怕一萬，只怕萬一，男方們點玩都好，最好就係做足安全措施。
撰文：賢