古語有云：「食色性也」，不過一個國際性調查就發現，大家嘅性愛時間佔一生當中不及百分之一。提到時間，要收到準確報時信號有好多方法，其中一個方法對於男士們嚟講更加係非常養眼。喺芸芸咁多種職業當中，邊一個職業嘅女仔最多桃花呢？
小弟我今年三十來歲，好話唔好聽，人生已經度過咗差不多一半，雖然稱唔上有成就，但係至少都叫做有納稅，亦冇大奸大惡，只係間唔中睇吓AV自我娛樂一番。話時話，我前半生都係虛度光陰居多，而後半生相信亦唔會例外，咁其他人又會將一生用嚟做乜呢？上床嘅時間又有幾多呢？最近一個國際性運動用品品牌進行一個大型調查，喺美國、英國、加拿大、德國等9個國家搵到超過9,000位成年男女協助，藉此了解一下佢哋人生當中嘅時間分配。結果發現大家都將好多時間花喺使用高科技產品當中，最常見嘅就係用手機同電腦啦，時間佔去大家一生當中嘅41%，如果以每人平均可以生存25,915日嚟計，即係用咗10,625日喇！而大家做運動就用咗0.69%時間，換言之只係得179日。至於做愛又用咗一生幾多時間呢？對唔住！時間真係少得可憐，只係佔一生當中嘅0.45%，即係一生只有117日咋！
小弟一向做人都相當有時間觀念，不論返工定係約會都絕少遲到。為咗令自己唔會遲到，當然要戴手錶方便睇住時間做人啦！而家陣手錶就唔戴喇，因為手機已經可以將時間功能完全取代，之不過手機嘅時鐘幾方便、幾咁功能齊備都好，坊間有一個報時器卻完全唔能夠被捨棄，呢個就係「美女時計」喇！所謂嘅美女時計係搵嚟大量美女，由佢哋手執一個上面寫上不同時間嘅紙牌拍照，用家透過手機程式或者打開網頁，就會見到呢班報時美女嘅照片。最近日本賽車女郎選舉「D1最高獎」推出一款美女時計，搵呢班索爆賽車女郎為大家報時，大家想睇時間又想睇靚女的話，就一定要Click上http://www.bijint.com/cc喇。
以前啲人話七十二行，行行出狀元。不過隨時代變遷，家陣又何止得72個行業咁少，打機都可以成為一種職業啦！而有啲行業只係得男人從事，例如打齋嘅喃嘸師傅，亦有唔少行業由女仔做比較方便，例如按摩師。喺芸芸咁多行業中，有冇邊一行嘅女仔特別受異性歡迎，特別容易招惹狂蜂浪蝶呢？早前日本進行一次相關調查，搵來490名職業女士協助，結果排名第三位係藥劑師，第二位係接待員，咁又唔出奇，接待員每日都要見咁多人，當然容易惹起男士注意，甚至有意「認識」啦！至於排第一位嘅係秘書，當中有秘書小姐話原因可能係男士們受到電影同AV嘅影響，令佢哋對秘書充滿幻想喎！呢一點我絕對認同。
撰文：賢