好多女仔都鍾意高富帥，咁生得矮嘅男仔又有冇運行呢？絕對有，因為有調查顯示日本女仔唔介意揀又矮又肥嘅男仔做對象。去旅行有時唔一定係遊山玩水咁簡單，英國一個調查反映出當地人去旅行其實只係偷歡嘅藉口。正所謂一次生，兩次熟，三次大結局，初次約會重要，但係第二次約會如果想有下文就要注意一啲事項喇。
小弟生得一副五短身形，仲要肥肥白白，但係我一向都唔覺得有咩唔妥，連少少自卑感都冇，因為一樣米養百樣人，唔會全部女仔都只係鍾意高大靚仔，小弟喺唔少夜蒲場合遇過唔少女仔大讚我得意又可愛！一個來自日本嘅調查，從其結果當中見到喺某種限制環境之內，矮同肥係有優勢。該調查訪問咗206名日本女大學生，要佢哋喺矮、肥以及禿髮男之間作出選擇，當中揀矮仔嘅女仔佔大多數，約有73.3%，佢哋表示男仔生得矮對於日常生活影響不大，所以一啲都介意。另外，有14.1.%會選擇肥仔，有女仔話肥仔可以予人安全感，亦有女仔話肥仔屬於潛力股，某日成功瘦身可能變成靚仔。最後，只有12.6%會選擇禿髮男，揀呢個選項嘅女仔就話禿髮男都有其魅力o架！
澳門除咗係博彩勝地，亦係一家大細過去享受美食嘅好地方，當然更加係男士們尋花問柳之地啦。至於美國方面亦有賭城拉斯維加斯同澳門一樣咁好玩，更加係唔少英國男人出軌嘅好地方。網站VegasSlots早前就進行過一項針對英國人嘅調查，源於英國人相當喜歡飛去賭城玩樂，故研究一下佢哋到底過去搞邊科。調查訪問咗1,000名曾經去過賭城嘅英國人，發現有19%受訪英男去過賭城偷食。之不過，英女一樣唔輸蝕，有成16%去賭城搞搞震，比率上絕對同英男不相伯仲。部分受訪者就表示，去賭城度假其實冇乜好玩，如果唔偷食的確係冇其他事情好做咁話喎！如果真係咁，賭城有關當局真係要注意一下，睇吓需唔需要發展博彩以外嘅娛樂設施喇。
記得第一次同女仔出街真係好緊張，擔心對方唔滿意當日安排嘅行程，又擔心自己會遲到，仲要擔心自己嘅打扮是否醒神有型，心理壓力好大呀！到第二次約會因為有經驗，壓力就大大降低。然而，日本一位戀愛專家表示第一次約會固然重要，但係如果男士們希望可以喺第二約會就「得米」，就要留意幾點事項。第一點係打扮，初次約會時男仔都會打扮到「行一行」，咁第二次約會又點算呢？專家話最好就係同上次衣着相若，變化係要有，但係愈少愈好。第二點要注意嘅係話題，相信喺初次約會時大家都講咗好多話題，故第二次約會就盡量搵新話題，否則會令對方覺得相處沉悶。第三點就係盡量爭取身體接觸，專家話女仔應承第二次約會，其實「成事」機會大，增加多少少身體接觸可以令對方覺得今次約會不一樣，提出「深入了解」嘅要求都不易被拒絕，當然最後都係要睇對方嘅反應，因為唔係個個女仔都咁輕易讓男方得米，男仔千祈唔好亂咁嚟呀!
撰文：賢