夫妻之道在於坦誠同遷就，但係性生活又可唔可以協調得到呢？到底婚後嘅上床次數係點先夠呢？提到上床，除咗讓男女雙方發洩慾火，仲可以增進感情，更有助養顏。白衣天使人人尊敬，早前喺內地竟然有人借白衣天使形象搞搞震，真係離晒譜！
兩個人一齊生活有好多事情需要注意，因為各自有唔同生活習慣，曾經聽過有夫婦因為擠牙膏咁簡單嘅問題而搞到離婚收場。至於性生活咁大件事，當然更加需要多加注意。喺呢方面，要留意嘅除咗性生活嘅質素，仲有次數，到底結成夫婦之後一個月做幾多次最合適呢？早前日本就訪問咗500位已婚女性，問佢哋一個月行房幾多次最好？答半年一次嘅佔19.8%，一周一「行」嘅有20.8%，而認為每月一「行」則佔最多數有28.8%。當中有女性表示一個月做一次，令大家唔會有太大嘅體力負擔，而且相隔一段日子，大家都有時間培養好足夠嘅慾火同情緒，玩起上嚟就零舍激烈喎！
相信世界上所有女人都希望自己青春常駐，甚至愈來愈靚。為咗達到目的，女士們不惜大灑金錢，甚至無所不用其極。女士們想令自己變靚啲，小弟就幫唔到手喇，如果想令肌膚變得更健康、更有光澤、更有彈性，咁就請大家聽兩位皮膚科專家講兩句喇。專家Dr. Elizabeth Tanzi話做愛令體內嘅皮質醇水平下降，呢種增加壓力嘅賀爾蒙係令肌膚老化同變得暗啞嘅元兇。另一位專家Eric Marlow Garrison補充話做愛將血液帶到皮膚，令肌膚保持彈性，仲減低患皮膚炎風險，對美顏護膚有幫助。不過，要做幾耐至有效呢？專家話每次做20分鐘最有效果！但唔係個個男士都做到咁耐時間喎！專家話自慰一樣得，唔一定要靠男人，咁我哋男人咪冇晒市場囉！
白衣天使，即係護士，係小弟最尊重嘅職業之一，因為佢哋每日都不辭勞苦咁為傷病者服務，除咗照顧飲食，仲有為病者清潔，雖然話係職責所在，但係要處理種種穢物都唔係一件容易嘅事。護士咁值得敬重，早前喺內地居然有人影衰佢哋。5月12日係國際護士日，設立呢日嘅目的當然係希望藉此表揚護士對社會嘅貢獻啦！之不過，喺四川省遂寧市一個公園就上演一場借護士日之名嘅鬧劇。當日公園出現咗6名模特兒，佢哋換上護士服搞攝影會，本來玩制服誘惑唔係咩大問題，但係呢班模特兒擺出各種姿勢搔首弄姿，大晒玉腿，意態撩人，簡直破壞晒護士嘅純潔形象，可怒也！
撰文：賢