成日都話做日本人好幸福，除咗有好多美食和美景之外，作為日本男人仲有好多機會同心儀嘅AV女優接觸，例如參加女優嘅握手會、由AV廠主辦嘅旅行，仲可同女優玩足兩日一夜。之不過，想再深一層同女優激戰就唔係咁簡單，一定要過三關，仲要夠膽當眾露「鳥」！
日本AV廠近年好鍾意與民同樂，不時公開招募AV迷擔任素人男優，與女優們同台演出，甚至達成夢想一親香澤，親身感受一下女優們嘅體溫以及床上功夫！而AV廠咁做嘅目的，唔係單純想引起話題，或者取悅作為米飯班主嘅AV迷，另一主因係日本AV界近年出現男優荒，現役AV女優過千，但係正宗AV男優卻只有70幾人，以此數量，即使個個男優都精力旺盛、實力非凡，亦不足以應付龐大嘅工作量！正因為咁，招募素人男優演出就可以為男優分擔「消耗」，仲可以一次過出動大量素人男優，令作品形成人頭湧湧之勢，一家便宜兩家着。不過，同大家講咗咁耐，可能有人會問：「到底班素人男優堅定流呀？係咪由男優串演咋？話晒班女優身嬌肉貴，邊會咁易同街外人激戰呀？」本身小弟都有咁嘅疑問，不過睇完最近一次大揭秘之後，疑慮盡消！
日本AV資訊網站R18.com最近經AV廠Moodyz高層首肯，畀佢哋嘅採訪團隊深入面試現場，了解招募素人男優嘅實況。提到Moodyz呢間AV廠，每年都會拍多部用上大量素人男優嘅作品，最具標誌性嘅系列當然係《粉絲感謝祭 啪啪聲巴士旅行》啦！上年M廠憑住呢個系列成功喺AV界大型頒獎禮典AV Open當中，強勢奪得多個大獎。M廠最近食髓知味，繼續拍攝系列最新作品，經過約一個月嘅公開招募，喺5月頭M廠就請到通過第一輪篩選，50多位合資格人士到面試現場。準男優們先要申報自己經過檢查，證明自己冇性病，然後仲要填一份個人資料表格，需要填寫嘅資料包括命根兒嘅長度、粗幼、手淫習慣、最高手淫次數等，考大學都可能唔使填咁多資料。
現場當中，可見一班準男優好有規矩咁輪流填資料申報表，填好晒之後未面試已難掩興奮心情，興奮到即席開個誓師大會，齊齊大嗌幾聲振一振聲威，同時祝福大家可以面試成功，喺正式拍攝期間齊齊整整咁「中出」班AV女優！到正式面試時，準男優四個四個咁排排坐同M廠嘅監督、製片等見面，氣氛相當嚴肅。準男優會被問到勃起狀態如何、最鍾意嘅女優係邊個、希望自己對住女優邊個部位爆發等尷尬問題。據一位曾經多次參加面試嘅AV迷表示，負責面試嘅M廠負責人有時可能會對面試者嘅命根大細有懷疑，試過即場要對方除褲觀賞其下體係小鳥定巨鵰，如果係前者一定唔會被錄用，因為咁樣拍出嚟效果太差。今次有幾多個合格被錄取就冇公布，而班素人男優嘅面試表現到底係龍係蟲？M廠負責人話好快會喺官網公布，大家畀少少耐性啦！
撰文：賢