我國嘅國寶熊貓，究竟同日本AV女優有咩關係呢？前者成日都唔慣交配，後者則以表演交配為事業，唯一共通點相信只有大家都一樣咁可愛咁吸睛。最近，AV集團KMP將兩者融為一體，旗下專屬女子組合Million Girls Z變身成為熊貓女拍劇，力戰擁有陰濕觸手嘅墨魚怪，呢場大戰到底鹿死誰手？
日本AV界近年有好多女優組合，作出拍AV以外嘅發展，除咗登台載歌載舞展現歌藝同舞藝，好似惠比壽麝香葡萄咁，仲擁有屬於佢哋嘅夜間電視節目《麝香葡萄之夜》，每集都有三十幾個美女同台演出，真係睇到觀眾目不暇給！由於惠比壽麝香葡萄乃係由多間AV事務所合力打造，背後得到嘅財力同物力支援實在非一般AV女優組合可比，故想欣賞到其他AV女優嘅電視節目實在比較困難。不過，AV集團KMP都唔輸蝕，喺
日本TOKYO MX電視台搵到個頻道，安排旗下女優組合Million Girls Z演出劇集，喺該頻道每個星期一深夜時段播放，而今次3位成員包括星美梨香、佐倉絆及友田彩也香更加變成人見人愛嘅可愛熊貓女演出，相信不僅男人鍾意，女士們亦應甚為接受。
Million Girls Z今次拍嘅劇集叫做《侵略！Panda Girls Z》，故事講述喺無邊無際嘅宇宙當中，有兩個族群一直都進行無休止嘅戰鬥，呢兩個族群就係可愛嘅熊貓星人同陰濕邪惡嘅墨魚星人。兩族輾轉由宇宙打到落地球，希望打贏對方之後成為地球嘅統治者，以地球作為新一個繁殖基地。為掩飾外星人身份，3位女熊貓星人即係星美梨美等變身成女高中生，一邊喺地球生活，一邊同潛伏喺地球嘅墨魚怪戰鬥。從劇照當中，可以睇到今次Million Girls Z女優拍得相當投入同用心，而KMP更加搵來知名特撮劇集監督，曾經拍過特撮片《電王者》等作品嘅河崎實炮製呢套劇集，難怪不論打鬥、特效及墨魚怪嘅造型都咁有特撮片感覺！抵讚！
暫時《侵略！Panda Girls Z》已經上演咗5集，除咗3位可愛熊貓女，仲搵到唔少Cosplay模特兒擔任壞人角色，好似海參愛以及增田PIYO等，佢哋扮演百合墨魚怪，利用超能力對付熊貓女，佢哋嘅超能力唔係要嚟打傷人，而係用嚟令班熊貓女高潮迭起，喪失戰鬥能力。另一方面，墨魚怪亦有出現，其觸手相當陰濕，專門吼實熊貓女嘅三點嚟玩弄。之不過，由於節目受電視尺度所限，動作唔會太過火，熊貓被攻擊嘅時候，鏡頭只會捕捉佢哋飽受快感衝擊嘅一副高潮樣。從拍攝花絮當中，見到3位女優為咗拍呢套劇都幾辛苦，事關佢哋着嘅熊貓戲服幾乎包住晒成個人，仲要出戶外喺烈日之下跑來跑去，友田彩也香仲因為太熱而不適趴地，由熊貓變成趴地熊，真係辛苦晒你哋喇！
撰文：賢