情慾戰場

對於鍾意打SLG戰略遊戲，同時又喜歡玩十八禁遊戲嘅Game迷嚟講，想一次過享受呢兩種遊戲嘅樂趣，一直以嚟嘅選擇都唔多，好彩日本遊戲製作公司Eukleia最新推出嘅《珊海王的圓環》，正正可以滿足到好此道玩家嘅需要。

呢隻糅合戰略同成人元素嘅作品，由無數海灣所組成叫做魚諾修嘅地方，讓6名英雄包括海賊阿里茲、魔術師索尼亞等，互相爭奪圓環。至於遊戲流程，玩家先揀選心水角色，然後收集各地嘅資源，跟住利用資源嚟加強船隊及僱用士兵，最後玩家一邊攻擊對手獲取戰果，一邊讓對方嘅支配力扣減至零，最終令對方屈服喺玩家膝下。

至於戰敗者嘅下場，則取決於玩家所揀選嘅角色，而每個角色都有個共通點，就係會將戰敗一方捉上床征服。另外有一個遊戲貼士，就係玩家記得要喺積儲戰力嘅同時，尋找多啲同伴幫手，究竟用乜嘢辦法先至可以吸引到得力助手呢？話明係成人遊戲，唔使下下畫公仔畫出腸啦！