生活於現代社會需要面對好多壓力，而壓力過大會影響到我哋嘅精神狀態同情緒，更加會影響到性能力添！從面相可以睇到一個人嘅性格特徵，原來從雙手亦可以睇得出男人嘅命根長度。男女拍拖係好甜蜜，但係男人認為最甜蜜嘅時光係喺上床嘅時候。
壓力來自好多方面，經濟、工作同感情等，而男人喺床上亦會有壓力，擔心自己嘅性能力唔能夠滿足到伴侶，之不過壓力愈大愈影響床上表現。Pixie McKenna博士係一位專門治療男士不舉以及勃起功能障礙嘅專家，佢早前喺英國一個傳媒訪問當中表示40至70歲嘅男士當中，有近半人遇上性功能下降嘅問題，而要保持勃起硬度以及持久力先要減壓，其次就係戒除飲酒習慣，睇吓平時服用嘅藥物有冇影響性功能。另一方面，有問題一定要搵醫生診治，同時亦應該同伴侶講清楚，博士話有42%受訪婦女面對男伴有勃起功能障礙嘅時候唔會怪責對方，反而會覺得自責，繼而令佢哋心情低落兼且更加唔想做愛，結果令感情變差。博士補充話男人要喺床上滿足女性唔一定要靠抽送，營造浪漫氣氛以及愛撫一樣得。
識得睇掌相嘅師傅可以從掌紋睇出一個人嘅命運，雖然我唔係師傅，但係我就可以從一隻手睇得出男人長定短！咁神奇？我都係全靠睇咗韓國仁川嘉泉大學一個研究。早前該大學搵來144名男士協助進行研究，睇吓男人隻手同下體長度有冇關聯，研究人員先後為佢哋量度兩次命根長度，一次係喺正常時候，另一次係處於興奮狀態嘅時候，然後再量度佢哋嘅手指長度。結果發現男人右手嘅食指同無名指長度相差愈短，命根就會愈長。另外，拇指同食指亦與命根長度有關，因為將呢兩隻手指擺成L形之後，兩指指尖嘅距離通常與陰莖相若。有興趣嘅話，即刻測試一下準唔準確啦喂！
第一次拍拖、第一次拖手等，相信對唔少人嚟講都留下深刻印象，而第一次上床更係令人難忘！然而，第一次上床除咗有壓力，仲有難度，因為男方即使慾火高燒，但係都唔知點樣開口好！想容易向對方提出上床要求，除咗要有一定感情基礎，不同場地帶來不同氣氛亦係考慮嘅因素。日本網站「Mensjoy!」早前訪問咗超過200位日本成年男人，睇吓佢哋鍾意喺咩場合向女友提出第一次上床嘅要求，結果排第三位係一齊去外國旅行，排第二位係去溫泉旅行，雙雙去旅行本身已經令成功率上升，仲一齊浸溫泉，心情更加放鬆，開口求歡嘅成功率自然大增。至於第一位竟然係本地旅遊，點解呢？有受訪男士解釋話本地遊容易令女方接受，而且容易編排行程同掌握時間，安排得好令女方開開心心，求歡嘅成功率必定更高！
撰文：賢