日本成人漫畫為咗挑起大家嘅原始慾望，都鍾意以喜劇作為包裝，讓人睇得開心又過癮。不過有成漫家卻偏偏以灰色嘅調子嚟營造與別不同嘅漫畫風格，大師級人馬Cuvie係其中一位，而《羞人欲望！》就係其代表作。
呢位喺1976年於日本愛知縣名古屋市出生嘅女漫畫家，筆名Cuvie係從時尚雜誌《CUTiE》中取得靈感。佢自細對西方搖滾樂相當着迷，被當中灰暗嘅歌詞所感染，對佢日後嘅漫畫創作有着極大影響。喺佢19歲時推出改編自《格鬥毒蛇》嘅一般向同人誌作品，可惜反應麻麻。縱然受到極大打擊，但係佢並無放棄，仍然繼續創作，並且推出成人同人誌作品《ONE STEP CLOSER》，出色嘅故事同畫功，被成人漫畫月刊嘅編輯睇中，自此開始成人漫畫家嘅生涯。
點解女仔人家會向成漫界發展呢？佢坦言自細對色情事物感到好奇，就連被丟喺草叢嘅鹹書亦唔放過，因此佢好喜歡畫成人漫畫。入行後，佢喺多本成人漫畫月刊連載作品，並且推出超過20本作品，當中帶點灰色嘅情慾故事，深受漫畫迷歡迎。
至於Cuvie嘅代表作《羞人欲望！》於2009年推出，先後再版多次，每次都火速售罄，更被成漫迷視為珍藏作品，當中收錄咗曾於漫畫月刊《COMIC快樂天》上刊登過嘅11個短篇漫畫，包括《I beg you》、《Line》、《撒謊的是小偷》、《倒貼隨便吃自由》、《好喜歡做與很舒服的事 前篇》、《好喜歡做與很舒服的事 後篇》、《從頭再來》、《Lilac Smell》、《欲情》、《咆吼》及《GOOD MORNING KISS》，其中以《Line》及《從頭再來》最值得欣賞。
《Line》講述男主角係個平凡嘅上班族，有日放工途中，一位同佢擦身而過嘅索女跌咗條手巾，於是佢執番畀對方，卻驚覺手巾原來係一條性感內褲，索女含羞答答咁請男主角送佢返屋企，因而激起男主角潛藏心底嘅慾望，結果兩人去咗酒店開房，並展開連場大戰。事後女方表示兩人相遇係緣分，若男主角有需要隨時可以搵佢曳曳。不過男主角卻相當避忌，決定以後唔再跟對方聯絡，但卻發現對方無時無刻都喺佢身邊出現，究竟男主角最終會點抉擇呢？
至於《從頭再來》則講述男主角林直純喺聚會中，得悉暗戀多年嘅女生立花，同佢嘅好友結婚，因而情緒低落。有一日，佢喺街上遇到高中女同學志藤彩芽，原來兩人讀書時拍過拖，但最後直純飛咗對方。呢次相遇，令直純同彩芽愛火重燃，兩人更喺家中肉搏起嚟，呢個時候直純先至發現自己原來一直對彩芽念念不忘。至於兩人最後會發展成點呢？就要等大家自己睇喇！
作者：Cuvie
出版：WANI MAGAZINE
撰文：魂