成日都聽見女仔話男人鹹濕，拍拖只係掛住上床曳曳，其實係人都有慾念，女仔本身都有啦！雖然話歡場無真心，但係唔少日本仔喺歡場中搵到真愛。手機交友程式大行其道，外國有位女記者用咗兩日時間以快速約會程式識男仔，結果當中好多人都極速現狼相。
師傅同一班師兄成日都向我呢位後輩侃侃而談有關夜蒲經驗，令小弟相當受用，佢哋經常表示歡場無真心，喺夜場識到嘅女仔，千祈唔好將佢哋嘅說話當真，更加唔好將大家嘅關係當成真，玩得開心都唔好忘記保持戒心。我本身好少出去玩，所以呢啲說話記唔記住都冇乜所謂，但喺日本就有唔少男人同歡場女子發展出感情，同對方拍拖甚至結為夫婦。日本民調網站Qzoo早前就訪問咗684位20歲至60歲嘅男士，發現當中有逾1成受訪者曾同歡場女子談戀愛。而喺呢1成多嘅男士當中，人數最多嘅係老闆級，咁都唔出奇，做老闆咁有錢，女方梗係傾力投懷送抱啦！其次就係公務員，收入穩定，薪高且出糧準，成為長期飯票亦一流。而排第三位就係高學歷人士，據聞係因為佢哋好渴望戀愛，但係又難搵對象所致。
正所謂飽暖思淫慾，個肚食得飽自然要搵渠道發洩一下多餘精力，唔知係咪咁，大家不難發現骨場、夜總會附近都開設唔少食店。女士可能會話：「咁樣有可能係方便你哋班男人去滾嘅時候冇咁尷尬，畀人發現嘅時候就訛稱去食飯囉！」咁講法就誤會咗男人喇，其實女人一樣會思淫慾，而且泛起慾念嘅次數比諗起零食為多添。早前美國有機構做過一項調查，搵咗283名年齡介乎18至25歲嘅女生協助，探討佢哋每日諗緊乜。好多人都話女仔愛零食，而調查發現此話並非全無根據，因為女仔平均每日會諗起零食15次咁多，之不過，女生對性愛就更加有興趣，平均每日會思淫慾18次！不過，女仔喺呢方面就冇男仔咁好性，因為男仔平均每日有34次性幻想，即係每個鐘頭至少一次，冇辦法啦！年輕人精力旺盛，唔通好似老人家咁清心寡欲咩！
智能手機有好多程式方便大家互相溝通，除咗一系列聊天軟件之外，仲有好多交友、約會手機程式可以畀大家尋找對象。之不過，呢類約會程式雖然方便，但係唔會個個用家都咁純情。澳洲一位女記者早前用咗48小時，親身體驗一個快速約會手機程式，發現原來有唔少用家都幾離譜，離譜到得啖笑。記者喺兩日當中一共同2,500個用家接觸過，當中約有1,300位回覆，有698位回應一句簡單問候語，200個問及天氣好壞，90個有禮地問女記者今日過得好唔好，呢啲都好正常，但有61個就作出性暗示，睇吓記者肯唔肯出嚟玩一夜情，有16個用家表示自己可以提供性服務，有2個即時求婚，另外一個仲離譜，叫記者開個價，睇吓出幾多錢記者先可以做其性奴，唔知程式管理者有冇辦法可以杜絕呢種人呢？
撰文：賢