夜遊業界搵食最重要講求乜嘢？三個字，快狠準！快者，就係要做得夠快手，啲客快嚟快去兼走頭夠快；狠者，就係對住一啲賴皮玩家，一定要夠狠；準者，就係要睇準市場需要，不論玩家嘅口味有幾咁特殊同另類，但凡有要求都可以滿足到佢哋嘅口味，自然可以長搵長有。
內地嘅黃業嚴打極都有，歸根究柢都係一個錢字，加上需求多嘅情況下，搵錢速度夠快，因而吸引唔少人鋌而走險。話時話，究竟佢哋搵錢速度有幾快呢？呢單發生喺山西太原嘅新聞，可以畀大家參考一下。話說喺上個月初，當地有關部門查獲一個利用微信招嫖嘅色情集團。呢個集團嘅組織人係個神秘女人，佢喺微信度識咗個做囡囡嘅任姓女仔，於是出價500人仔日薪，叫佢喺太原一間位於商住兩用大廈內嘅單位做架步，並叫個女仔組織囡囡兼透過微信色誘玩家上門，點知做咗幾日就被有關當局破獲。雖然做得幾日，但喺咁短嘅時間內，佢哋嘅生意勁旺，每日嘅預約排到密晒，而每日生意額有接近10萬銀。如果經營耐啲嘅話，每個月真係有成幾十萬，甚至過百萬收入！咁鬼和味，難怪啲人甘願冒險啦！
有啲無賴玩家睇準囡囡唔敢張揚，同埋唔敢報警嘅心態，有人玩完後壓價，有人唔畀錢，甚至有人偷錢添！好似喺台中一位應召女郎就遇到一件咁嘅事。話說喺上個月，佢收到一名陳姓男子嘅電話查詢，兩人相約去汽車旅館見面，傾掂以5,000台幣（約1,250港元）嘅全套價交易。完事後，囡囡去沖涼，點知出返嚟，驚覺畀人偷咗手袋同手機，心有不甘嘅佢即刻報警。警方去到男子屋企，對方不但表現驚訝，更低聲自語：「估唔到佢（指囡囡）夠膽報警。」原來佢睇準賣淫女怕事嘅心態，於是偷去佢嘅手袋同手機後，就駕駛電單車離開。結果該男子被控盜竊，囡囡則被控違反社會秩序維護法，呢鋪真係兩敗俱傷。
日本嘅奇風異俗真係好多，但小弟並非指佢哋嘅習俗，而係講佢哋風俗業嘅種類。從背德人妻住家風俗店，到超巨乳豐滿孃兼玩摔角嘅風俗店都有，不過講到呢期最騎呢，又最踩界嘅相信非呢間位於東京，以「未亡人」為賣點嘅連鎖風俗店莫屬。所謂「未亡人」即係寡婦咁解，分別喺池袋、新宿同涉谷都有分店，店名叫「東京危險情事 喪服的未亡人」。顧名思義，即係店內嘅風俗孃不但係寡婦，仲要係「老公」過身冇耐，佢哋清一色以黑色喪服上陣。呢種咁奇怪嘅主題，真係令人不禁講聲「大吉利是」呀！縱然呢班風俗孃未必係真正嘅未亡人，只係莫講話對賭仔嚟講唔老利，新年流流更係禁地，更何況人哋「報稱」仍處於哀悼期，你仲要同囡囡曳曳，嗰種道德觀確實非人類先至有。
撰文：魂