傳統精子銀行好多都冇得畀有需要嘅女士選擇精子來源，不過最近開始有所改變，女士終於可以揀對象喇。日本癡漢唔少，隨住智能手機普及，更加有唔少人變成偷拍狂徒，有幾多？上升咗兩倍咁多呀！警察係正義使者，市民嘅好朋友，然而美國嘅性工作者就唔多鍾意佢哋，更加怕警察多過麻煩嫖客。
以前成日有朋友講笑話太耐冇女朋友，需要定期去捐出精子幫助有需要人士，好過精子生產完之後冇出路又被身體吸收咁浪費。其實去有關機構捐精都唔係一件容易嘅事，至少要抵得住各種尷尬場面。不過，近年中國就捐精方面比我哋香港進步好多，因為內地已經有機構透過手機程式募集捐精者，澳洲昆士蘭大學嘅經濟學家Stephen Whyte更加話呢個方法好有商機添！Stephen Whyte進行過一個調查，搵來56個曾透過網上捐精嘅男人，發現佢哋好多都係擁有高教育水平以及行為溫文嘅紳士級男士。Stephen Whyte仲表示家陣女士上網搵捐精者人數趨升，傳統精子銀行又冇得畀佢哋揀捐贈者，而女士本身多數都鍾意精子來自紳士，故Stephen Whyte認真設立平台畀女士揀對象借種絕對有商機！
科技進步，幫助大家探索世界，不過有好多人就將科技亂咁運用，好似早前就有人用航拍機勇闖泰國王宮禁地，觸犯當地禁忌喇。除此之外，喺日本就因為智能手機普及，愈來愈多狂徒用手機偷拍女仔嘅裙底春光。根據日本警視廳嘅統計數字顯示，2010年因為偷拍而被捕嘅個案有1,741宗，到2014年相關個案已經增加到3,265宗，警視廳表示被捕人士嘅數字大增近倍，但係偷拍狂徒何其多，警方又拉得幾多個？故實際數字可能更高。另一方面，警視廳表示2014年因偷拍而被捕嘅個案當中，佔56%嘅犯案者係用智能手機進行偷拍，故呼籲女士們要提高警覺，而另一方面亦會頻密派出反偷拍小組將偷拍狂徒繩之以法。
小弟雖然唔鼓勵從事性服務行業，但係性工作者唔少都係為勢所逼至下海，而佢哋都係出賣勞力搵食，故小弟一向都好尊重佢哋。喺外國，性工作者相對於本地得到嘅重視更強更明顯，更加有一個網站叫做「國際黑名單」（The National Blacklist）提倡保護性工作者，幫助佢哋應付危險嫖客。根據國際黑名單嘅統計，喺美國洛杉磯約有4%妓女投訴被暴力對待，3%投訴撞正麻煩嘅嫖客，但係就有12%投訴同當地警方有關，原因係佢哋被調查嘅時候遇到不禮貌甚至暴力對待，以及收到警方嘅電話滋擾等，睇嚟喺外國，邪牌愛差人嘅說話唔多適用。
撰文：賢