咪以為男人去滾先會偷偷摸摸，查實從事夜遊業界者亦要偷偷摸摸地進行，否則惹嚟有關方面嘅注意，真係幾頭痕吓。日本有風俗店為咗搵食，偷偷地推出嚴禁嘅本番服務，台灣就有夜遊業者以暗語廣告行銷。不過對內地業者嚟講，縱然防得住有關方面嘅關顧，亦防唔到民間組織嘅法眼呀！
一直以嚟玩家同夜場都好怕「KO」現身，前者驚被扣留兼罰款，後者最怕拉人兼封舖，當然仲要罰款。為咗避開突擊檢查，夜場都絞盡腦汁諗辦法，坊間更流傳唔少關於佢哋用過嘅招數。不過對北京嘅夜場人士嚟講，佢哋仲要面對近年出現嘅「勸導隊」！所謂「勸導隊」係一種類似社區糾察隊嘅組織，成員主要由社區幹部、居委會工作人員、社區退休居民同志願者組成，好似朝陽群衆、西城大媽等就屬此類。話說喺今年9月成立嘅豐台勸導隊，早前其中一位隊員發覺社區內有班衣着暴露嘅女子喺某幢大廈出入，就立即舉報，結果破獲咗一個淫窟。大家咪以為呢類組織規模唔大，據講目前單係豐台區已有245隊勸導隊，合共隊員多達7,340人，人強馬壯！
內地嘅招嫖廣告唔想寫得咁露骨嘅話，以前就會用陪遊、陪玩、陪賞等詞語，用以掩人耳目唔使咁張揚。有人就話呢種做法好老套，但你話佢老套咩？台灣不但有人抄襲之餘，更係令人眼界大開！台灣網絡上出現咗一則「應徵陪老人看夜景旅遊掃墓」嘅招聘廣告，廣告上表示每位應徵者每次陪老人睇夜景、去旅行或掃墓，可以獲得400台幣（約100港元）嘅收入。呢個廣告甫推出，即刻惹嚟一眾網民揣測，而當中最過癮嘅就係估呢個廣告係綁票密碼。不過呢啲都係民間猜想，至於南投縣刑警就覺得並唔係咁簡單，認定佢係色情業招聘小姐陪玩嘅廣告，原因係廣告中所提到嘅「培墓」，首先係個字唔合語法，其次係「培墓」係「陪摸」嘅諧音，故此推測係色情廣告以吸引好色之徒查詢。不過，實情係咪咁呢？唔好意思，引起熱議後個廣告聯絡電話已經失聯，只留下一個大謎團。
稍為熟悉日本風俗業嘅話，都知道當地嚴禁風俗業提供本番服務，所謂本番即係兵器相交嘅活塞運動是也。不過正所謂有求必有應，廣島流川嘅部分風俗店，仍然夠膽偷雞提供呢種服務，而呢類提供本番服務嘅風俗店，則會稱為「一發屋」。所謂一發嘅意思，即係玩家來發射咁解。咪以為提供呢種服務嘅風俗孃，都係一啲上咗年紀嘅女性，據講大部分都係30歲以下嘅囡囡。相信大家都估到點解佢哋甘願鋌而走險，全因一個錢字，收入比冇本番服務賺多5成！至於呢啲風俗店係咪只提供本番服務呢？咁又唔係喎！佢哋連一般風俗店所提供嘅玩法都有得玩，皆因佢哋都擔心好快會被有關當局取締，所以務求喺最短嘅服務時間內，令玩家甘願畀錢玩多幾項增值服務，搵夠錢之後就轉換地方再做生意，希望能夠逃過法眼。
撰文：魂