人體有自己嘅生理時鐘，不同時間都有不同嘅調節，有專家話朝早同午後進行床戰最好。男人喺性戰之後總係呼呼大睡懶理枕邊人，因而令女伴情緒十分低落。
我哋嘅身體相當奧妙，遇到一般損傷會自動復原，仲會自我調節體溫以及內分泌，我哋行得走得，食得瞓得都要好好多謝呢副身體。有研究顯示，人體喺每日24小時當中，都會因循生理時鐘而進行內部調節，中醫學上亦有不同經脈因不同時間而輪流顯著運行嘅理論，咁我就八卦想問一下，邊一個時間上床最好？最能夠凸顯男性雄風呢？英國牛津大學嘅Paul Kelley博士就從生理時鐘進行過仔細研究，佢表示朝早8點多人體被陽光照射，體內嘅睾丸酮素就會被加速分泌，呢種性賀爾蒙水平提高，雄風自然強勁啲。博士補充話如果想晨操愉快就唔好飲咖啡，雖然醒神，但係會令感覺神經變得遲鈍喎。另外，下午3點亦係上床好時辰，原因係呢個時候已經將午餐消化得七七八八，體力同精神相當充沛，體內嘅性賀爾蒙亦係處於較高水平。
好多女仔都話男友喺發生肉體關係之前對佢千依百順，但係「得手」之後，態度就會變得忽冷忽熱，愛理不理。即使男友冇出現如此情況，上床之後就會抱頭大睡，懶得理女伴感受，因而令女性感到不滿。《性醫學期刊》早前發表咗一項調查報告，指出經過搵來230位年齡介乎18至55歲嘅女士進行調查之後，發現有46%嘅女性患上一種叫性愛後焦躁症（Post-coital Dysphoria）嘅問題，喺上床之後出現焦躁、憂慮等不安情緒，與古希臘名醫蓋倫所講嘅名言「每種動物性交後都會情緒低落，除咗女人」完全相反。之不過，該調查雖然得到結果，但係就冇咩改善建議提供。當然，情況嚴重梗係要就醫對症下藥，而男士們不妨多關心伴侶，上床之後予女伴多一點體貼，而女方有咩唔開心亦唔好介意講出口。
撰文：賢