雖然話酒能亂性，但係有研究話啤酒有助性功效，不僅可以增強性慾，仲可以令男人有更強嘅持久力。戴綠帽係男人大忌，但係點樣先知道老婆有出軌行為呢？日本一位私家偵探道出箇中四大特徵。為咗令自己喺房事中有更強勁表現，唔少男人都會尋求藥物幫助，英國就有調查顯示服春藥情況普遍，甚至去到嚴重嘅地步。
飲酒過量嘅遺害，相信大家了解亦有所聞。之不過，得閒嗒兩杯又確係幾寫意幾放鬆，唔知係咪呢種放鬆心情，啤酒有助男士喺床上戰鬥力更強呢？乜啤酒有咁嘅好處咩？大家唔好咁快下定論而急急去飲酒住，且聽專家解釋一下啦。一位叫Kat Van Kirk嘅博士話啤酒除咗當中嘅酒精成分，能夠令男女雙方情緒更加容易牽動之外，仲可以增加男士持久力，因為酒精有少少麻醉成分可以減低下體嘅敏感度之外，當中仲有唔少成分對性有助益。唔少啤酒之中都會加入蜂蜜，亦有助提升性趣。另外，博士仲引述美國嘅研究表示，黑啤含有豐富礦物質，特別係鐵質能夠令血液中嘅紅血球增加，血液可以更充分咁流向陰莖令勃起時嘅膨脹度更高喎。不過計我話飲酒都係適可而止，以免酒後亂性，而且飲得太多對肝臟同心血管系統都有負面影響。
男人大丈夫天不怕地不怕，不過有樣事情男人最忌就係老婆出軌，即係戴綠帽！相信全世界任何男人都忍受唔到老婆勾佬。之不過，自己顧住返工，好難成日看實老婆喎，咁如果老婆真係出軌的話，又可以點樣預先得知呢？正所謂綠帽唔怕戴，最緊要除得快！日本一間私家偵探公司嘅負責人今野裕幸最近接受傳媒訪問時表示自己處理過唔少相關個案，從而綜合出老婆出軌嘅四大現象：第一就係經常煮飯嘅老婆突然開始減少下廚，轉而用即食食物或外賣充當晚餐；第二就係頻頻外出，話要去咩朋友聚會或同親友食飯；第三係老婆嘅內衣褲煥然一新，顏色又鮮艷；最後就係拒絕同老公行房，同時大家嘅交流都有所減少。老實講，今野先生講得係幾有道理，不過以上嘅現象相信好多男人一早都知道晒，下次唔該發表多少少新論點啦！
久唔久都睇到有新聞報道有上咗年紀嘅男士，為咗令自己喺房事上雄風回復當年勇，於是服食來歷不明嘅春藥，最後搞到要入院治理，甚至有性命之虞。其實，除咗老人家，好多正值中年又或者係青年嘅男士都對春藥有興趣，原因係希望性能力更強更勁，憑出色表現令伴侶傾心。英國有新聞指出當地興起搞狂歡性派對，參加者會激戰72小時，而佢哋之所以咁瘋狂咁持久，全因服食春藥增強性能力同性慾。另一方面，英國有關方面亦發現當地人對春藥嘅使用日漸頻密，倫敦嘅性功能專科診所就發現喺2013至2014年有64%嘅求診者有服過春藥，而當中嘅75%更加有注射春藥入體內，情況愈趨嚴重。英國皇家全科醫學院嘅Richard Ma就表示濫用春藥除咗對身體有影響，仲有機會引起性病傳染問題，希望當局正視一下喎。
撰文：賢