良性大話有時無可避免，專家仲教路話同伴侶多講大話有助增加床上快感，提升情趣。雖然話食色性也，但係唔食飯會餓死，而唔做愛就唔會死，然而有科學家就話男人寧願捱餓都會揀做愛先。下體毛髮對下陰有保護作用，美國更有人推出陰毛護理產品，當成頭髮咁呵護。
由細到大，長輩都教導我哋千祈唔好講大話，仲經常引用《狼來了》呢個童話故事嘅寓意嚟嚇我哋。之不過，長大之後相信大家同小弟我一樣都講過唔少大話，例如見家長嘅時候，女友母親問今日啲餸菜啱唔啱食，即使食嘅係鹹魚青菜都要二話不說點頭大讚未來外母廚藝一流，你好我好，呢啲大話認真係唔怕講。來自美國肯塔基大學嘅Kristen Mark博士就話，要促進兩性關係，提升床上性趣，男方不妨向伴侶多講大話喎。博士表示研究話男女雙方談性愈多，彼此享受對性生活就愈滿足，男方大可以向女伴胡亂吹水，話自己昨晚夢見自己玩3P、玩SM等，女伴好可能會以「乜你發夢都夢到做愛咁鹹濕呀！」但係博士話咁樣已經可以勾起女伴對性嘅聯想，男方可以再進一步向女伴表示今晚想玩得特別啲，增加女伴對交歡嘅期盼，當晚一定會係一個熱情如火嘅晚上喎。
小弟好鍾意睇《人在野》，睇吓點樣野外求生，從中吸取求生知識以便日後遇到相同情況都可以留住條命仔。而野外求生要留意嘅除咗係有棲身之所，仲要搵潔淨水源以及食物，因為冇食物任你幾惡都冇用。不過，若然要大家喺食物同美色之間作出選擇，大家會揀邊一樣先呢？英國倫敦大學有科學家就表示男人會揀性喎。該科學家早前進行過一項有關線蟲嘅研究，發現佢哋喺極端環境之下，面對住食物同異性，通常都會揀後者，原因係佢哋對性有反應嘅細胞係覆蓋住對食物有反應嘅細胞。而該科學家憑呢個線蟲研究結果推論到人類身上，話男人亦會有相同反應。之不過，呢個研究結果一出就被人反擊，話線蟲同人類差十萬九千里，根本唔可以相提並論。
頭髮又被稱為三千煩惱絲，老實講頭髮有時真係帶來唔少煩惱，生得太長又要剪一剪，太亂又要梳一梳，冇頭髮嘅仲要日日諗計點樣可以令髮囊激活再生出頭髮來。除咗頭髮，唔少人仲為下陰嘅毛髮煩惱，因為太濃密太雜亂的確係會影響性事樂趣。英國一項調查則發現51%受訪女士係唔會修剪同打理陰毛，有人就將佢視為商機。Emily Schubert同兩位姊妹眼見好多出名豪放嘅女星都有護理陰毛嘅習慣，愈來愈多人受佢哋影響，於是就成立咗一個陰毛護理用品品牌，仲推出咗幾款專門為陰毛護理嘅髮油、洗髮水，該款髮油更加用咗9種天然油脂製造，務求令女性嘅陰毛柔順又帶光澤喎。不過，我相信男士們都唔係咁識欣賞，依然會覺得一條毛都冇最吸引。
撰文：賢