唔少女性喺享受床笫之歡時，其實並不歡樂，原因係佢哋難以獲得高潮，之不過咁樣好可能係同佢哋上床時諗咗其他嘢有關。雖然機會話嚟就嚟，但係好多人都未能及時好好把握，有七成女性表示後悔錯過一夜情嘅機會。酒精害人影響一生，仲令好多女仔提早失身，甚至喺無意識之下被性侵。
都市人生活繁忙，故大家都學習咗一項新技能，就係分心喇！大家可以見到好多人一邊同人傾偈一邊玩手機，我就習慣一邊玩電腦一邊睇電視。咁樣分心法當然無傷大雅啦，之不過好多情況之下切忌分心，好似揸車同工作，做愛亦一樣，特別係女士們，因為咁樣對於獲得性高潮大有阻礙。早前一個調查訪問咗251名年齡介乎18至67歲嘅女性，問及佢哋嘅性生活情況，受訪者當中有176人表示經常能夠喺交歡或自娛期間獲得性高潮，大約一個月內獲得90次左右性高潮，其餘嘅女士則較難獲得。調查同時發現，較易有性高潮嘅女性經常會性幻想，而另外一組難以得到高潮嘅女性唔單只冇性幻想，喺交歡嘅時候個腦仲會諗咗其他事情，咁心散唔全情投入性事當中梗係冇高潮啦！不過話時話，係咪對手令佢哋冇晒性幻想先會咁呢？
師傅教落追女仔最緊要膽大心細面皮厚，一見到有機會就要打蛇隨棍上，咁先可以大大增加成功機會，至於點樣為之成功？嘿嘿！我同各位讀者都心照啦。事實上，唔係得我哋男士們希望同女仔第一次約會就有「深入交流」，女方其實亦有咁嘅意思。美國愛荷華大學搵咗一班女仔協助研究，搵佢哋同特選男仔見面，然後再強制停止佢哋會面，結果得出有74%女仔表示後悔冇同對方再進一步。而感到後悔嘅女仔當中有28.9%表示因未能夠喺認識對方嘅二十四小時內上床而後悔，有36.2%女仔就話因為後悔今次失機，往後會更加主動。之不過，日本心理學家內藤誼人睇完結果就表示大家應該改變想法，唔好成日諗住結識異性係為咗上床，上床之前有充分了解同溝通，對大家嘅感情發展最有好處。
間唔中同朋友飲兩杯有助聯擊感情，放鬆緊張嘅情緒，之不過由於小弟曾經試過飲大咗撞過板，故家陣飲酒都係適可而止，以免重蹈覆轍。然而，好多年輕一輩卻未有此撞板經驗，有酒飲難免唔識得收掣，作為長輩父母應該好好勸導佢哋一番，否則恨錯難返。美國水牛城大學有個研究，訪問咗228名年齡由18至20歲嘅女仔，發現佢哋開始飲酒嘅年齡平均為14歲，至於失身嘅年齡平均則為16歲。負責研究嘅Jennifer A. Livingston補充話呢班女仔當中有飲酒習慣嘅一群比較開放，喺佢哋嘅社交圈子當中少有討論性知識，令佢哋未婚懷孕以及感染上性病嘅風險偏高。而佢哋當中更加有兩成試過喺酒後無意識之下同其他人上床，部分更懷疑被性侵過，果然係酒能亂性。
撰文：賢