求安全同求生存不嬲都係夜遊業嘅最大課題，事關佢哋想生存嘅話一定要多啲人識同多啲客人嚟幫襯，只係做太高調嘅話，就會惹起有關方面嘅注意。點樣可以喺呢兩者之間尋找平衡點？真係好考佢哋嘅營運技巧。
對一啲生於網絡年代嘅人嚟講，上網、玩Apps已經係生活一部分，只係對從事夜遊業者嚟講，點樣可以有效運用電腦科技卻係一個相當頭痛嘅問題。對於內地夜遊業嚟講，以前嘅營運方式好簡單，就係透過廣告嚟吸引玩家注意，其後隨住網絡興起，廣告平台便由平面媒體轉到網絡平台。不過面對手機社交App嘅興起，老一代夜遊業者就未必跟得上，呢個時候點算好呢？內地近年就興起一啲專業嘅科技團隊，為夜遊業提供一條龍服務。所謂一條龍，就係包括管理社交平台嘅運作、設計交易嘅方法、發布相關嘅訊息同照片，而呢種服務對夜遊業者幫助相當大。當然，隨住內地對網絡色情訊息嘅關注提高，佢哋嘅生存空間將會面對極大嘅挑戰。
囡囡想安全咁搵食真係唔容易，除咗擔心自身嘅安全問題外，仲要提防有關方面嘅突擊檢查，萬一畀對方搵到證據嘅話，真係相當麻煩。好似台灣基隆就有個喺色情護膚店工作嘅囡囡，早前正當佢喺店內嘅包廂為玩家提供服務時，點知遇上警方突擊檢查，喺情急之下，囡囡竟然將避孕套吞落肚。問題就喺呢度，就係個套用過未呢？答案係用過，亦即係裏面裝滿白汁！咪睇小一個小小嘅膠笠，據一位外科醫生稱，雖然膠笠有機會隨便便排出，只係由於小腸嘅腸道較窄，有機會導至腸道阻塞，不但會令患者嘔吐兼肚痛，仲要開刀先至可以攞番出嚟，後果可以相當嚴重。老實講喺嗰一刻，囡囡又點會理得咁多喎！
日本新宿歌舞伎町之所以有歌舞之稱，係因為喺二次大戰後呢一帶，開設咗好多艷舞劇場、夜總會、酒吧等夜店，因此得到呢個稱呼。不過隨住時代變遷，呢度嘅艷舞夜店數量不斷減少，至今只僅存3間，當中包括喺1977年5月開業嘅「T」字頭艷舞劇場，喺全盛時期不但吸引眾多AV女優、成人模特兒、艷舞女郎等喺度表演，更係幾乎晚晚爆滿。只係家陣艷舞吸引力不再，顧客層轉向外國遊客，尤其係中國旅客為主，而為咗可以提升吸引力，更冒險推出全裸演出，並讓女郎同觀眾合照，結果成為有關方面嘅焦點，因而被停業。
撰文：魂