男人都希望搵個嬌滴滴嘅女仔做女友，梗係啦！如果女伴高過自己嘅話，又點彰顯到大男人嘅威風，同埋滿足到男人保護女人嘅心理呀？不過日本成人漫畫家春風道人嘅作品《Love-size》，就話畀大家知喺愛情世界裏係唔分高度之餘，女高過男曳曳時更加刺激又過癮添！
以愛情作為創作題材嘅日本成人漫畫有唔少，只係好多時所謂愛情橋段，都係落喺頭嗰幾Part當中，跟住落嚟嘅都係器官同肉搏特寫，甚少好似春風道人咁擅於將愛情、劇情同激情三者處理得咁平衡，既唔會影響故事性，又唔會破壞大家睇肉搏戲嘅心情，配合埋出色嘅畫功，睇到人流晒口水。講到佢咁勁，其實佢同好多漫畫家一樣，並非一開始就向成漫界出發，早喺2006年佢推出首本青少年漫畫《遊戲店》，可惜反應麻麻，之後就轉戰成漫界，並推出處女作《Double☆Impact》。出色嘅故事性加上愛情元素，令佢一鳴驚人，翌年乘勢推出另一本成漫作《這些話我覺得還沒夠》。雖然喺成漫界獲得唔錯嘅成績，但話晒佢努力咗咁多年都係想畫青少年漫畫，因此佢試圖回歸青漫界，卻始終唔成功。及至2011年，佢終於下定決心喺成漫界發展，先後推出《你的語音郵件》、《戀愛戰術》、《我真的有！情慾視頻》、《離家出走的公主》、《夏日將臨》等人氣作品，而今次介紹呢本《Love-size》就係喺上年5月推出嘅單行本作品。
喺愛情世界裏，男方係咪一定要高過女方呢？春風道人喺《Love-size》中就解答咗呢個問題。當中收錄5個單元故事，包括《Double Love!》、《池邊大作戰》、《母親Gokoro女兒Gokoro》、《如果你喜歡癡女》及《夏一夜》。每個故事中嘅女角色都有個共通點，就係佢哋個個都擁有高挑身材，比男主角高成個頭。不過講到當中最精彩嘅作品，非《Double Love!》莫屬。故事講述女主角漆原綾音雖然生得高大，但卻因貧乳身材，加上年紀大關係，故此一直唔敢向暗戀多時嘅圖書管理員村上表白，喺徵詢過好友美琴及用塔羅牌占卜後，佢鼓起勇氣衝上村上屋企，並將對方推倒床上激戰！另一邊廂，對愛情異常主動嘅美琴亦向暗戀多時嘅亮示愛，縱然得悉對方想搵個識做家務同煮飯嘅女友，只係佢仍然決心將對方嘅身同心據為己有，並趁對方飲醉酒將佢擒住。經過一輪激戰後，美琴去浴室沖涼，點知呢個時候有個女人推門而入，對方竟然係綾音！原來村上同亮係同一個人，皆因男主角全名叫做村上亮！兩女發現真相後，決定對呢位花心男進行肉體調教。
名稱：《Love-size》
作者：春風道人
出版： Core Magazine
頁數：202頁
撰文：魂