上床最重要就係做足安全措施，之不過英國就有近七成人明知自己患有性病卻隱瞞病情。雖然喺屋企享受床笫之歡夠舒適，但係好多人都鍾意去時鐘酒店爆房，調查發現日本女仔最憎男伴去爆房嘅時候唱K。男女有別，到底雙方嘅理想性伴侶數字又有冇分別呢？
師傅成日教我做任何事都好，最重要就係安全第一，特別係提醒我尤其係上床嘅時候要做足安全措施，否則會搞出人命又或染上性病，兩者都博唔過。之不過，事實上又有好多人心存僥倖，英國藥物銷售網MedExpress就進行過一項相關調查，問咗2,500名成年人，而佢哋全部都試過一夜情。調查結果令人最驚訝嘅地方，有近七成嘅受訪者知道自己患上性病，卻又向伴侶表示自己身體健康。點解佢哋要講大話呢？當中有92%受訪者話咁做係怕伴侶唔肯上床喎。另有受訪者承認如果確診患上性病，上床嘅時候無論係進行交合定係口舌都會主動戴套，總算有良心。
好多香港人都慨嘆居住環境欠佳，最大問題就係地方淺窄，除咗影響心情，好多夫妻仲因為屋企唔夠地方而減少房事。而喺日本，特別係居於大城市嘅日本人唔好得我哋港人好多。之不過，佢哋要搵地方享受房事樂趣就比較方便，因為當地有唔少情侶旅館，即係時鐘酒店可以選擇，出外爆房更加成為唔少夫妻、情侶嘅習慣。然而，爆房都有禁忌，早前有個調查就訪問咗唔少女性，綜合出兩大爆房禁忌，任何男人犯下大忌，女方都唔會再考慮同佢哋爆房。爆房禁忌排行第二位就係慳時間買外賣喇。受訪嘅女仔表示男方若然為咗慳時間買外賣食物喺爆房嘅時候食，就會覺得對方毫無生活品味，同佢哋發展落去都冇意思。禁忌第一位就係爆房時唱K喇！日本好多情侶旅館設備齊全，房間入面仲有K唱，之但係女仔就最憎，話男方同佢哋爆房應該專注做愛做的事，想唱K好心就留番去K場唱到夠喎。
雖然話家陣男女平等，但係男人同女人對於理想性伴數目卻似乎唔對等，個人相信未來都好難改變男女雙方對於呢個數目嘅睇法，尋求對等嘅共識。英國有調查訪問咗2,000多名年齡介乎18至45歲嘅男女，問及佢哋認為男性同女性有幾多性伴至係最理想。男士認為男人一生人當中應有嘅性伴平均為32個，女人則為5個，嘩！咁嘅諗法認真係厚此薄彼喎。至於女士嘅諗法就相對公平得多，佢哋認為男人應該有11個性伴，女人亦應有10個。理想歸理想，實際上佢哋又有幾多個性伴呢？有三分之一受訪者表示佢哋會向伴侶虛報性伴數目，而當中72%聲稱咁做係因為自己嘅性伴太多。計我話，理想性伴數目幾多都唔重要，最重要嘅係唔好欺騙感情就得喇。
撰文：賢