唔少演員都會為演好角色又或者嚟個新嘗試而反串演出，男演員做女角，女演員做男角，但係就好似會將角色原來嘅性別直接調換，特別係演出歷史故事嘅時候，點都諗唔到將武則天變做男人，係咪？不過，喺日本漫畫家眼中根本冇嘢係冇可能，《一騎當千》就將大家都熟悉嘅《三國演義》中嘅武將全部變晒女兒身，而且個個都好波添！
內地土豪大媽鍾意飛去日本買廁所板、電飯煲等日本製造產品，從中可以見到佢哋對於日貨嘅瘋狂程度以及鍾情度，其實日本人不知幾咁鍾意我哋嘅歷史，特別係三國時代，大家從眾多日本電子遊戲以三國為題材就知喇。而歷來日本漫畫界亦相當鍾意取材於《三國演義》，經典嘅有出極都未出完嘅《龍狼傳》、破格地以奸雄曹操為主線嘅《蒼天航路》等，而情色漫畫當中亦有《三國志艷義》，當然講到養眼又點少得《一騎當千》呢！《一》由漫畫家鹽崎雄二創作，喺2000年開始連載，由於故事入面充滿擁有豐乳肥臀嘅青春美人兒，作畫又將佢哋畫得動態豪爽，打鬥之間成日都走光路底，誘人嘅畫面令《一》人氣高企，正係咁亦令爭議聲大增，點解有爭議？咪因為故事中嘅巨乳美女全部都係由三國演義中嘅男武將轉世而成，好多三國迷都難以接受呢種性別改變。
之不過，愈多人講就愈多人睇，而且作者又的確將班美女之間嘅打鬥場面，繪畫得夠細膩、夠豪邁又夠氣勢。《一》主要講封印着三國猛將靈魂嘅勾玉輾轉流落到日本一班女學生手中，得到勾玉嘅女仔各自變身成不同武將，而主角就係擁有小霸王孫策勾玉嘅孫策伯符，其他嘅武將亦有關羽雲長、張飛翼德等。至於故事主線方面，講三間勢力不同嘅學校互相攻伐，以圖統一學界，而三大勢力都係建基於三國嘅魏蜀吳之上，劇情亦係三校互鬥，幫助曹操孟德嘅司馬懿仲達黃雀在後，其實就同三國演義幾乎一樣，過程加插科幻式打鬥以及奪寶情節。雖然劇情同故事性就麻麻哋，但係勝在班猛將個個都身懷巨乳，打鬥打到衣服撕碎，係咁露半球同底褲，即使一點不露，誘人姿勢依然相當吸睛，不失為值得欣賞嘅作品。
撰文：賢