紐約時裝騷好威咩？連續幾日登娛樂版頭條，而Kanye West設計新裝更被彈似「喪屍」，真係請都唔想去呀！嚟緊隔籬洛杉磯個慈善Fashion騷就真架勢喇，事關美國四仔界首個大型Fashion騷正式開催，仲要係先玩Cosplay再嚟性感內衣「貓步」，過百脫星瞓身撐場，必定「波」光四射，撲唔到飛唔緊要，上網拍賣件戰衣威吓都夠爽啦！
話係四仔界首個慈善Fashion騷一啲都冇錯，只不過善款唔係幫N無人士，而係四仔界內嘅貧苦脫星啫！因為搞手正係一個叫言論自由聯盟，全名Free Speech Coalition（FSC）係專為美國四仔界台前幕後發聲及爭取權益，今次目的為籌集經費同時亦可團結業界上下一心，繼續令色情發熱發亮，係咪好偉大呢？組織做啲乜爭取啲乜你冇得參與，所以你毋須關心，但是次Fashion騷你同我都可以睇埋一份，「早鳥優惠」（Earlybird Price）門票就60美元一張，晨早售罄唔使諗，而VIP座就100美元，貴但筍到喊驚，皆因有得行紅地氈入場，仲有脫星親身款待，送埋雞尾酒坐靚位慢慢歎，但老實講，要撲飛過美國洛杉磯，睇怕冇幾個，而官方亦聯同Fleshbot成人新聞網站搞咗個送飛活動，全球名額只得3個咁大把，每名幸運兒可獲門票兩張，講真不如咪送好過啦！細佬都係實際啲，了解吓當日發生啲乜好過。
今次活動名為FSC After Dark, Capes & Panties，集內衣時裝及Cosplay服於一身，據官網表示，當晚會由Wicked片廠「大家姐」、自稱性愛學者嘅Jessica Drake與Cosplay王后Tanya Tate兩大熟女擔任主持，果然夠晒分量。睇到佢兩個出現，大概都估到Tanya Tate會主持Cosplay嗰Part，親身上陣扮演不同「超級英雄」外，仲有數之不盡嘅業界兄弟姊妹撐場，求其噏幾位，Keira Nicole, Kimberly Kane, Bridgette B, Mercedes Carrera等……，屆時會化身不同英雄造型，真係星光熠熠呀！
呢班四仔脫星身上Cosplay除咗着嚟行騷，事後仲會掟上網於Live Auction拍賣，所得收益就歸大會所有，而成功買到心頭好嘅更會獲得當日現場DVD乙隻，彌足珍貴呀！唔鍾意Cosplay？無問題，等下半場內衣騷，由Baci Lingerie贊助，十幾位火辣脫星親身示範性感內衣，Model包括有：Ash Hollywood, Nina Elle, Cassidey Klein, Bianca Breeze, Sasha Heart及Mia Li等，講真，有邊個巴打覺得唔正先？阿妹着過有味內衣，可以喺官網Fashion Show/Auction一欄鬥搶，價高者得。如果你係鍾意玩唔鍾意着都得，仲有一欄Silent Auction，呢個係情趣用品拍賣，雖然列出嘅玩具性商店都有，但以表支持，睇怕巴打都冇所謂嘅！而除咗玩具拍賣即日開始外，其餘兩個要喺當地時間24日晚，待個騷完咗就有得Bid，好期待呀！
的確，Free Speech Coalition呢個四仔組織嘅工作及內容對四仔迷都係悶到發慌，甚至唔想關注佢存在與否，但多得佢哋捍衞「言論自由」，你同我今日先咁多四仔睇咋！因為佢哋使命係保護及支持成人娛樂持續發展，不被道德之士入侵，過往發言人都甚有「江湖地位」，喺09年Nina Hartley就坐上發言人之位，巡迴全國演說，唔係今日邊有咁多人撐呀？不講不知，早喺1970年代，美國四仔界已出現一群勇於為成人工作爭取權益嘅人，因而成立Adult Film Association of America（AFAA）組織，專為鹹片可於成人院線上映及爭取鹹書喺報攤發售，而其後成人錄影帶逐漸流行，又一個名為Adult Film and Video Association of America（AFVAA）同時成立，但到90年代初，為壯大力量抵制當時嘅淫褻條例，兩者合併成為今日嘅FSC囉！
脫星跨媒界搵銀都唔係第一鑊啦，大大小小年終不計其數，今次FSC玩到咁大當然值得掌聲鼓勵，而個體戶脫星都唔執輸，紛紛掛上「藝術」之名出呢樣嗰樣搵銀，新鮮滾熱辣嗰位叫Abigail Mac，阿妹就唔真心啦，據聞佢搞咗個Mac City Threads網站搞藝術，講到天上有地下無，甚麼結果攝影及時尚設計，讓想像變成實體，將設計推到高潮，而Mac City Threads不止係一個商業品牌，正確應該係商業同時顧及高道德共存嘅一種藝術喎！講完都唔知講乜呢？好簡單，之唔係一件阿妹黑白嘜頭印花白Tee囉，摷勻全網只得一個款，賣45美元（約351港元），阿妹真有良心！
網址：http://maccitythreads.com/products/salivate
撰文：祖