呢個世界冇嘢係冇可能，只係有啲嘢當你遇到嘅時候，總不免會畀佢嚇親。好似以前話女人嘅事業線好吸引，家陣卻潮興露「大腿眉」，仲有原來A罩杯日女十分罕有，最令人諗都諗唔到嘅係，指插後欄竟然有停止打嗝嘅作用呀！
女士身上真係有好多誘人無比嘅「線」，好似事業線、人魚線等，只係原來家陣露呢啲線已經落伍，事關最近外國流行露出「大腿眉」（Thighbrow）！乜嘢叫做「大腿眉」呢？當女士曲腿，好似跪坐或提腿時，大髀同盆骨間因肌肉摺埋而出現嘅摺痕，據講由於呢條線嘅外形好似眼眉關係，故此得到「大腿眉」之稱。事實上有人發現，唔少鍾意喺網上分享自己靚相嘅名媛同女星，佢哋都會不經意咁露出誘人無比嘅大腿眉。不過話說回來，既然呢條眉人人都有，而且唔使做運動鍛煉，都係事業線同人魚線吸引啲！
雖然坊間有好多偏方停止打嗝，好似閉氣、細啖飲水10次、大聲笑等，但係講到有科學理據嘅卻好似冇乜。不過，加拿大兩位科普作家Mitchell Moffit同Greg Brown嘅著作《AsapSCIENCE: Answers to the World's Weirdest Questions, Most Persistent Rumors, and Unexplained Phenomena》，卻提供宣稱全球唯一一種經過科學實證嘅停止打嗝方法，就係將手指伸入肛門內，然後轉兩個圈，由於轉動手指會刺激到某啲觸發打嗝嘅神經，故此可令呼吸系統恢復正常，並停止煩人嘅打嗝。文中仲特別提到，實驗結果係從長期打嗝唔停嘅患者中得嚟。不過要用到呢種自插後欄嘅方法嚟停止打嗝，未必人人接受得到。
呢個世界有句說話，就係物以罕為貴。如果呢句說話係真理嘅話，大家就要拿拿臨搵個貧乳日本女友喇！事關早前日本有電視節目進行咗個調查，發現自1980年以嚟，日本女性胸部不斷升Cup，當中以A罩杯嘅比例從35年前嘅百分之58.6，大幅下滑至今日嘅百分之5.3，而呢個百分比相對巨乳Cup數嘅F罩杯百分之6嚟講，仲要少百分之0.7。換句話說，現今日本貧乳女性比巨乳妹仲要罕有！調查結果公布後，有人表示：「咁係咪代表A罩杯女性『瀕臨絕種』？」不過亦有持反對意見嘅人表示，日本嘅胸圍都有刻意將罩杯做得細啲，從而營造出升Cup嘅效果。不過姑勿論結果如何，講到尾男人都係鍾意大波妹嘅。
撰文：魂