Hello一聲真係無限可能？你同我都未必得，假如有對大咪咪，肯剝肯磨肯捱，仲夠薑自封為DJ走向群眾，咁先有機會成名，邊個咁搏命？之唔係脫星DJ Darcie Dolce囉！
每次出場Darcie Dolce第一句例牌都係講「Hello Every 波哋」！事關佢係一位音樂騎師，同時又係一名脫星，咁所以阿妹日頭落床磨，夜晚落場捽，呢種有開工冇收工嘅生活維持咗兩年多，今日終於叫有啲收成喇！但又唔好以為阿妹名成利就唔使撈噃，只不過係喺夜場捽碟令佢多咗人識，連帶脫星事業上位，兩邊都多咗工開啫。睇番佢入行初期，真係想搵人（目及）多兩眼都難呀！話說Darcie諗住做一名全職脫星，先喺網站「ATK Exotics」拍輯全裸寫真試水溫，雖然係全天然靚偈，可惜缺乏宣傳，結果影完寫真後，連落床執劑機會都冇，白白浪費咗兩年時間。及後，佢諗到將音樂同脫星合體，變身成音樂脫星，阿妹話每個人都需要音樂，而潮人又鍾意去蒲，只要喺夜場被多啲人認識就有機會紅。
早前喺一篇訪問中Darcie表示要面對人生交叉點！話說今日之所以有咁多夜場搵佢捽碟，只係貪佢有對32DD大咪咪，因而令佢感到非常失落，希望各界欣賞佢對音樂嘅熱誠以及打碟嘅技巧。無人懷疑Darcie對音樂嘅熱愛態度，但如果阿妹咁鍾意打碟，當日就咪公開自己脫星身份，同埋咪郁啲就拋對奶出嚟啦！喂，32DD大咪喺台上跳嚟跳去，雖然環境暗啫，但你當班蒲友盲嘅咩？而阿妹解釋話想打造性感DJ形象，因此每次演出都會自拍捽碟過程，然後掟上網分享，希望各界留意到佢嘅混音技術，證明佢係一位真正DJ喎！明白，性感到要全裸拍宣傳海報，性感到要着比堅尼捽碟，呢啲無非係想展現性感，辛苦晒！
最近Darcie經常拍住「閨密」脫星August Ames齊齊磨，阿妹就話同August係合作夥伴，但睇佢社交網，兩女形影不離，拍住去蒲同飲飲食食，不禁令人懷疑佢哋根本係一對。其實Darcie點講都好啦，上咗位講乜都啱，最重要係阿妹今日喺騎師界同脫星界都撈得掂，搵到銀，鍾意點就點，話之其他人點睇吖！
Darcie唔係第一個DJ脫星，亦唔會係最後一個，睇怕下年會愈嚟愈多囡囡跟風添！雖然呢個係脫星上位捷徑，但睇番多年來前輩嘅路，始終都係離不開老本行，好似Brittany Andrews咁，以DJ BritStar縱橫全球夜場捽碟，早前就宣布回歸床戰；Lupe Fuentes喺歐洲又唱又捽，結果咪一樣要拍寫真留住班粉絲，足以證明嗰班蒲友撐你，實情咪又係撐你副偈！
世上DJ何其多，真正搵到錢嘅DJ有幾多個？Darcie Dolce自封DJ，而DJ Calvin Harris又係DJ噃，但後者被《福布斯》選為本年全球最高收入DJ，過去12個月賺約6,600萬美元，呢位「捽碟王」捽嘢地方都係全球最貴最威夜場，而Darcie捽嘅係溝女場，好似拉斯維加斯夜場Body English，咁所以，你話掛住DJ個名幾好呃呢？
撰文：祖