雖然話成功須苦幹，但係家陣好多人都發覺自己幾努力都好，儲錢買樓嘅心願都係遙遙無期，心裏突然頓悟到成功須父幹，如果有父蔭至係最幸福。之但係，繼承父親嘅財產，甚至成為一位幫主嘅壓力都唔小，好似《內衣教父》嘅主角咁，雖然成為幫會頭目，有錢又有女，但係面對嘅困難就唔係個個能夠應付喇。
好多漫畫都一直陪住我哋成長，由細細個睇到成家立室兼生兒育女，好似日本知名嘅經典漫畫《多啦A夢》（前名：《叮噹》），本地嘅亦有《龍虎門》。提到長篇漫畫，歷時最長嘅應該係日本嘅《烏龍派出所》喇。呢套漫畫由1976年開始連載，至今依然未畫上句號，而今日介紹畀大家嘅《內衣教父》，回數亦拍得住《烏》。《內衣教父》出自漫畫家新田龍雄手筆，1988年面世，到2013年完結，總數為1,175回，單行本亦出咗108本，可以話相當長壽，現時嘅人氣漫畫《海賊王》出咗咁多年都仲未夠佢嚟。《內》作畫方面唔算細緻，畫風簡單配合故事嘅調皮風格，但表情同動作卻又勾畫得準確到肉。榮獲第42屆日本漫畫家協會賞大賞嘅《內衣教父》點解可以連載如此多回，仲長期保持人氣呢？咁就梗係靠故事內容啦。
《內》講述男主角近藤靜也係一間內衣公司嘅低級設計師，某日老父被刺殺，因而掌管黑幫組織新鮮組，但同時又要實現成為偉大內衣設計師嘅夢想，以及繼續見到夢中情人兼同事秋野明美而照常做內衣設計師。近藤靜也喺公司就係二打六成日畀上司刁難，但喺組織就係一幫之主，令其身份充滿矛盾，游走於兩者之間仲製造出好多衝突同笑料，令大家睇到會心微笑。與此同時，以不同身份生活期間卻令近藤靜也有所覺悟，例如喺鬧完人之後，返到公司到佢畀人鬧，讀者會同主角一樣從中感受到不同嘅生存以及工作意義，且嘗盡人間冷暖。呢一點可以話係本作嘅成功之處，一來主角有錢、好打，身邊又不乏美女以及得力手下，滿足好多男人嘅夢想，但同時作為公司低下層又令讀者感同身受，增強代入感，唔會好似其他作品塑造到主角集人間優越於一身咁離譜。本作包含黑幫元素、低下層奮鬥過程之外，亦有相當嘅色情元素，一來主角作為內衣設計師成日都會見到女性裸體，另一方面，主角嘅紅顏知己理江乃係慾女一名，成日纏住靜也交歡，雖然過程唔會詳盡刻畫，但係又滿足埋男讀者鍾意畀女溝嘅幻想。
撰文：賢