電話騙案再猖獗，都總好過企喺你面前擘大眼呃你咁無良吖！偏偏佢愈呃你愈冧，講緊嘅係歐美四仔脫星，繼上年驚爆全球嘅「Porn Stars Before And After Makeup」後，話咁快又嚟多Round喇，今次更加插一班裸模，睇完之後，你會懷疑佢哋究竟係化妝定喬裝呢！
細佬喺度呼籲：提防脫星騙案！如接獲任何自稱脫星或素人之情慾片段流出，色誘巴打網購四仔或要求信用卡資料入會，切勿輕信。如懷疑受騙，閣下自付，皆因你事先冇睇《AV達人》！的確，多年來被脫星騙「財」騙「色」嘅巴打，經過上年爆出多達96位索爆脫星「騙人」手法你都唔識驚，再中伏，唔係咎由自取係乜呢？之不過咁，美國四仔界睇得上眼嘅囡囡來來去去得嗰幾個，唔係畀呢個呃就會畀嗰個呃嘅啫，況且上次有近百位脫星未化妝前嘅素顏連男優都認唔到，何況隔住個「芒」觀賞嘅巴絲打呢？雖然「傷心事」大家都唔想記起，可惜網上依然繼續瘋傳，有網友要求脫星回水，亦有人鬧爆脫星攞正牌呃人，要求有關當局拉人封咪，怨聲載道，更有豁達巴打苦中作樂，喺眾多「騙子」中，呼籲全球網友喺最醜中揀個冇咁醜嘅出嚟自娛一番。
坦白講，呢壇嘢又唔怪得晒班脫星噃，一日最衰都係嗰位化妝師Melissa Murphy，阿姐曾經喺荷里活搵食，同過多位大明星化妝，其社交網站粉絲多達8萬人，而班脫星又肯聽Melissa姐話，畀佢影張化妝前同化妝後大頭相，然後掟上網分享，結果咪畀各大傳媒發大嚟做新聞囉！
至於今次新追加嘅「真面目」脫星約有10個，當中過半數為床上脫星，好似Jelena Jensen、男優Johnny Sins老婆Kissa Sins、新進90後索妹Veronica Vain及法律系學生Ashleigh Hannah等，雖然佢哋嘅素顏Look夠驚嚇，但「地獄指數」都唔及班90後裸模，講到底Model都係靠相頭加波哋搵食，又唔使賣床技，點可以咁離譜呀，當中美國妹Khloe Terae嘅素顏驚嚇度爆晒燈，睇怕佢嘅寫真出街，連自己都唔認得自己囉！話時話，家陣做脫星有神級化妝師幫手，邊使擔心被人認出吖，剝完引退再復出都冇人認得你啦！
醜到冇朋友嘅脫星有好多，咁邊個可以稱得上素顏中最索呢？有網站就列出過百位化妝前脫星畀網民投票，結果由Allie Haze拋離排第二嘅「女神」Mia Malkova奪得冠軍，當然阿妹係青春無敵，但細佬就覺得同佢活潑開朗性格，乜都笑餐飽形象有直接關係，而排第三係Tori Black，最令人意外係排第4嘅Brooklyn Chase，相信係佢化同唔化妝都冇乜大分別有關啩！
撰文：祖