現今日本嘅成人漫畫家有好多，因此唔好話要成名，要做到一年推出一本單行本作品，除非有相當人氣，否則真係好難做得到。是以可以好似成人漫畫家阿部津雲咁每年都有漫畫推出，足見佢有相當實力，而佢今年推出嘅作品《AV孃與妄想OL》更係備受矚目嘅作品。
喺成人漫畫界已經有超過8年資歷嘅阿部津雲，喺佢出道之前本身已係一位同人漫畫家，並且以漫畫助手身份活躍於漫畫界。及至2006年中開始，佢開始從事成人漫畫創作，並喺2007年12月推出首本單行本作品《慌慌張張LOVE！阿部津雲作品集》。佢畫工最特別嘅地方在於所繪畫嘅女性角色，不但擁有可愛嘅樣貌，而玲瓏浮凸嘅身材更係令人睇到流晒口水，故此作品甫推出便馬上大受歡迎，而佢其後所推出嘅《嚴肅認真LOVE！阿部津雲作品集》、《PUNCH LINE》、《花＊宮！在花咲商店街遊行》等，同樣獲得好評。去年9月推出嘅《AV孃與妄想OL》，更係佢集大成嘅作品，並且成為成人漫畫迷收藏嘅對象。
呢本單行本共收錄咗9個單元，當中分別有點題作品《AV孃與妄想OL》上及下篇、《身體一直發育的理由》上、中及下篇、《小林前輩的靜夏》、《Boion Train》、《Girls Next Door》同埋《交付給您》合共6個故事。當中尤以《AV孃與妄想OL》最值得一睇。大家唔好睇到《AV孃與妄想OL》嘅標題，就以為佢係講AV女優角色扮演OL嘅故事。其實佢講述OL女主角林命，每日都幻想同型男老闆岩崎曳曳，卻發現對方原來迷戀佢從事AV女優工作嘅姐姐森紗友里好耐。後嚟一次偶然嘅機會，林命化身成友里同岩崎發生關係。唔知道真相嘅岩崎有日就上林命屋企，諗住同「友里」再度溫存，卻發現原來「真命天子」另有其人。為咗可以挽回岩崎對佢嘅愛，林命便搵友里幫忙，決定以超凡床技重奪岩崎嘅心。故事情節不但輕鬆搞笑，而情慾場面更係令人心跳加速，難怪呢本成人漫畫被譽為阿部津雲嘅代表作之一。
漫畫名稱：《AV孃與妄想OL》
作者：阿部津雲
出版：竹書房
頁數：179頁
撰文：魂
相片來源：互聯網