波鞋街賣波街，金魚街賣金魚，咁繩索街賣嘅又係乜嘢呢？繩索？錯！答案係賣弄色情。話說位於德國漢堡聖保利區有條名為Reeperbahn嘅街，中文意思即係繩索咁解，原來喺好耐以前，呢度有唔少為港口船隻供應繩纜嘅公司，因而得名。須知道近港口又多水手，街上嘅色情服務慢慢變得繁盛起嚟，時至今日更成為當地人氣極高嘅合法紅燈區。情趣用品店、脫衣舞酒吧、色情按摩、夜總會，以至一樓一服務等等應有盡有，就連喺上世紀60年代初，當時尚未成名嘅英國樂隊披頭四，都曾經喺街上幾間夜總會演出過。由於呢條街係紅燈區關係，故此街道頭同尾都設有圍板，防止女士及18歲以下男士進入街道。