呢期最震驚歐美四仔迷嘅消息，一定係蜘蛛女Bonnie Rotten宣告引退！的而且確，巴打今日仲睇到阿妹嘅新作，但可以肯定，嚟緊你唔會再見到佢床上「噴水」演出，甚至乎露點寫真都未必有得睇呀！事關早前當事人喺社交網晒凸肚照片宣布有喜，曲線宣告退出幕前。
假如蜘蛛女Bonnie真係引退，究竟會有乜損失？可以肯定美國四仔界會少咗件敢做敢言，有能力將小眾作品成功帶入主流嘅脫星，其次係業界又少一位識得「鯨噴」潮吹囡囡，對鍾意睇重口味嘅四仔迷必定係傷心欲絕。成人新聞網站「Die-Screaming」就率先分析阿妹去留利弊，又話Bonnie已經大半年冇落床砌，依家推出嘅所有新作品，全部都係喺年初拍落，排隊陸續上架，至於阿妹喺呢段日子做乜？一係巡迴全國出騷，二係拍拖歎世界，仲有經營收費網站及個人性玩具系列生意，因此莫講話片廠請唔郁佢，就算佢肯都冇期落床啦！
對於蜘蛛女引退消息，成人傳媒認為係意料中事，理由係年僅22歲嘅Bonnie，喺短短3年內上位快過火箭，於各大頒獎禮總有提名兼攞獎，有錢有面嘅Bonnie已毋須再瞓身幕前工作，轉做經理人或搞成人玩具生意都足以夠使夠食。
早前Bonnie喺社交網Post咗張腹部微隆下半身相片，再宣布有喜14周，但網民反應冷淡，反而挑起前脫星Christy Mack團火發生口水戰！話說Bonnie喺社交網爆咗句為未來Baby建立一個健康乾淨嘅成長環境，因此決定放棄四仔事業，而同Bonnie早有積怨嘅Christy就睇唔過眼，喺網上開火，暗寸Bonnie不知所謂，自己賺夠錢上岸就話四仔界唔乾淨，其實最唔乾淨係Bonnie喎！呢單嘢無人敢插嘴，兩位當事人你一言我一語，直至凌晨5點唔瞓都繼續鬧。從呢件事更加可以相信，Bonnie再喺幕前演出機會不大，但阿妹尚要執導幾套四仔，睇嚟最快要去到明年初先可以正式引退。
又從呢件「有喜」事件，可以睇到Bonnie喺業界人緣麻麻，無人留言祝福，更加無人想知「經手人」姓甚名誰，不過，若Bonnie妹真係有餡離開四仔界，始終都係四仔迷嘅損失。
Bonnie早喺未捧走2014 AVN最佳脫星獎之前，經已宣布同性玩具品牌合作推出Bonnie Rotten Collection，由紋身貼紙、倒模J杯及震蛋等產品都有推出，但你點都估唔到，眼前呢件醜到冇朋友嘅吹氣公仔都係其中之一，喺購物網站未計運費賣成170美元（約1,326港元），係咪有啲過分呢？但你咪理，情意結嘅嘢，至今依然有價有市。
Bonnie嗰頭把口話為咗Baby忍痛放棄四仔事業，但行動卻係最誠實，至截稿當日為止，Bonnie喺Facebook每隔個幾鐘就Post一輯新性感寫真，其他社交網仲有全裸相添！真係唔知阿妹邊句真囉！
點解Bonnie有喜，Christy唔恭喜仲要鬧爆呢？咪因為兩人早有積怨囉！話說喺上年7月，即係Christy被前男友打爆缸入廠嗰期，Bonnie竟然落井下石，取笑Christy無機會復出拍四仔，結果兩人由嗰刻開始結怨，難怪今次Christy趁機瞓身喪鬧Bonnie啦！
撰文：祖