須知道日本嘅漫畫界人才輩出，而成人漫畫界亦係如此。想喺芸芸漫畫家中突圍而出，講求嘅唔單止係出色嘅畫功，同埋鹹濕又香艷嘅場面，更着重故事嘅吸引力先至得，就好似喺7月底先至推出，被稱為成漫界新人王起死快晴嘅最新單行本《放蕩》，就係最好嘅例子。
起死快晴呢個咁古怪嘅筆名已有先聲奪人嘅氣勢，加上出色又成熟嘅畫功，更係令人嘆為觀止！事實上，早喺2007年已經開始從事成人漫畫創作嘅佢，憑住出色嘅構圖而備受注目，而一直以嚟主要喺十八禁漫畫月刊《COMIC快樂天》刊登嘅作品，更係唔少人收藏嘅經典之作，並且獲得「挑逗系強作」嘅美譽。作品之所以備受好評，極盡香艷同滿足男士幻想嘅題材，絕對功不可沒。及至上月初，佢終於將以往喺月刊上刊登嘅佳作，合輯成首本單行本作品《放蕩》，甫推出馬上成為成漫迷入手之作。不過有趣嘅係佢好似並唔知道，反而係睇到銷量數字後，先至明白原來自己咁有人氣。
《放蕩》全書共收錄咗12個單元故事，分別有《COLOR'S》、《占卜師》、《追》、《玩具的情懷》、《同居HONEY》、《反對吸煙！》、《爭奪女僕》等，當中尤以《反對吸煙！》至為溫馨。故事講述喺一間家庭餐廳打工嘅可愛女侍應河內，有晚遇到一位喺店內食煙嘅男主角後藤。原來河內平生最討厭人哋食煙，仲要差啲被後藤搞到暈倒，於是大發雌威逼對方停止呢種行為，卻估唔到後藤被佢呢種威勢所迷倒，決定對佢展開挑逗。好快被燃起性慾嘅河內，雖然經過一輪肉搏，但完事後始終接受唔到煙民後藤。為咗追求到對方，後藤決定戒煙並成功再次征服河內，仲畀佢發現原來對方亦有溫柔嘅一面，最終兩人大團圓結局。劇情浪漫得嚟又鹽花十足，令呢個古仔成為當中至為好睇嘅一個單元。
撰文：魂