俗語有云同性相拒，異性相吸，只係隨住男女性觀念嘅變化，睇法已經有啲唔同。不過，喺某啲情況下，呢句說話仍然行得通，就好似有條辣妹喺火車廂內激戰嘅整蠱片中，男女乘客嘅反應真係南轅北轍。另外，竟然有愛心爆棚嘅索女，為咗保護動物不惜去跳脫衣舞。最後就係，大家點估得到原來接吻並非全球通行嘅示愛行為嚟呢？
每逢有男女喺公眾場所發生火辣嘅親密行為，佢哋嘅情慾片段好快就喺網上有得睇。呢啲片爆紅嘅原因，皆因男女都有種好奇心，而男人則多咗種色心，想睇吓片中女主角索唔索。不過，如果面前有兩位半裸索女喺大家面前，做出呢種行為，唔知大家嘅反應係點呢？話說專門玩大整蠱嘅YouTube頻道Gags Network，最近就上傳咗一條火車包廂內大整蠱嘅片段，片中兩位索女甫入車廂，就攬埋一舊兼互剝，上半身全裸而下身則僅着住條底褲。縱觀片中嘅男女乘客反應相當兩極，女嘅必定會執番佢哋嘅衫兜頭掟番過去，然後破口大罵，而男嘅則清一色笑吟吟睇好戲。從呢條片可以睇出，同性相拒，異性相吸嘅道理。
大家為咗保育野生動物可以去到幾盡？美國就有位樣靚身材正嘅索女，甘願為咗保育事業走去做脫衣舞女郎。今年24歲嘅索女Marlina Moreno，現時喺美國邁阿密大學修讀保育生物學碩士學位，而同時擁有市場營銷碩士學位，更係一位知名嘅雜誌模特兒及職業美式足球聯盟嘅人氣啦啦隊員。呢位內外兼備嘅索女喺2012年到南非旅行時，不但愛上大自然及野生動物，回國後更辭去啦啦隊工作，並喺去年成立攝製野生動物紀錄片公司Pink Monkey Media，以推廣保育工作。為咗籌集公司攝製及考察嘅資金，佢每個周末都會到夜店跳半裸脫衣舞賺錢。願意為保育動物去到咁盡，佢真係愛心爆棚呀！
咪以為濃情男女一定要接吻嚟示愛，事關美國有最新研究顯示，全球僅有四成六嘅人接受以接吻方式表達情侶間嘅感情。呢個由美國內華達及印第安納大學嘅研究人員合作，並發表於《美國人類學會》上嘅研究，透過佢哋從全球收集番嚟168個文化社會嘅數據，並向88位獨立人類學者進行包括「有冇注意到或者聽過有人喺親密環境狀況下接吻？」問題嘅訪問，結果發現喺唔同地域嘅文化中，對接吻睇法有極大嘅差異。好似喺北美洲嘅33個文化社會中，有15個並唔存在呢類型接吻行為，而歐洲同亞洲則分別有三成及兩成七表示唔能夠接受情侶間嘅接吻行為。研究人員解釋，若然社會階層愈複雜嘅話，佢哋愈能接受接吻行為。與此同時，佢哋又指出喺冇刷牙能力嘅社會中，唾液交換嘅行為比較唔常見。
撰文：魂