智能手機幾乎每個香港人都擁有一部，除咗令相關行業發達，仲造就千億次嘅手機瀏覽四仔紀錄。日本人嘅做愛次數低於世界人口平均每年嘅25.2次，為咗推動性福，水着索女變身為「套」女郎。現代唔少夫妻都面對生育困難，好似丹麥男人咁就被發現精子質量下降，要強壯精子大可關注日常生活。
家陣只要乘坐公共交通工具，就可以見到男女老幼都正埋頭苦幹，唔係睇書睇報紙，而係使用智能手機左篤右篤，好多時玩到入晒神連到站都唔知。智能手機帶畀我哋好多娛樂同方便，亦為全球成人影片界帶來重大衝擊。網絡公司Juniper最近提供咗一批有關成年人使用智能手機睇四仔嘅數據，指出呢個行為已經成為大家睇鹹片嘅主要方法之一，今年全球用手機睇四仔嘅次數將高達1,360億次，平均每個成年人就睇咗約348段四仔片段！於未來五年次數將會增加百分之五十五，原因係未來Wi-Fi以及4G網絡發展更加成熟所致！不過，研究員補充話，現時全球嘅色情影片市場總值620億英鎊，相信有唔少人會透過手機投向免費流動媒體市場，相關行業人士要點樣從中保持或增加利潤就要多花心思喇。
早前意大利海關截獲一大批由內地製造嘅冒牌安全套，發現品質差劣，避孕同預防性病功效成疑之外，用料仲含有毒性，好彩無流出市面，否則不知幾多意國人受害喇。其實購買安全套呢類咁貼身嘅用品一定唔可以貪平，咁免費又用唔用得過呢？乜有地方送安全套咩？有呀！負責送套嘅「套」女郎仲索到啪啪聲添呀！最近，人氣強勁、索到爆晒燈嘅日本水着妹今野杏南就獲一個日本安全套品牌委任為第七代宣傳大使，期間除咗宣揚安全性愛嘅訊息，仲會不時到街頭做宣傳兼派安全套。據統計顯示日本人每年嘅做愛次數，遠低於世界人口平均每年做愛次數嘅25.2次，故今次杏南嘅任務別具意義，希望可以佢嘅惹火形象加上安全套予人安全感覺，令日本人更有性福喎。
好多數據都顯示，唔少發達國家人口嘅生育率有下降趨勢，原因可能係都市人已經唔使好似古時農村人咁，需要增加人口維持工作效率養活家庭，亦有可能係現代夫妻各有各忙冇時間生兒育女，但係亦有機會因為生活，都市嘅男人精子質量下降以致女方懷孕困難。丹麥哥本哈根人口生育繁殖部門顧問Niels Jorgensen，於近十五年進行研究，發現佢搵來協助研究嘅五千位年齡平均為十九歲嘅丹麥男性當中，只有百分之廿五嘅精子質量屬正常水平，其餘嘅都質量偏低。Niels表示現代人生活上接觸到好多科學物質，例如存在於大部分塑膠物品嘅鄰苯二甲酸鹽就會降低男士嘅精子質量，而女士成日用嘅防曬乳霜亦建議唔好用，因為當中亦含有鄰苯二甲酸鹽，透過皮膚吸收到體內之後有機會影響男嬰嘅性功能發育。
撰文：賢