經常聽到身邊人話家陣嘅生活好無聊，每日都係返工放工，放工之後唔係湊女友或老婆就係湊仔，感覺成個人生都好灰。其實灰唔灰真係事在人為，偶爾留意一下身邊嘅奇聞妙事，笑一笑，不論係恥笑、傻笑定淫笑，成個人生即刻唔同晒，更何況咁嘅生活都冇乜唔好啫！
英文嘅一詞兩義有時真係幾得人驚，分分鐘嚇到阿媽面都青。話說早前YouTube頻道RomanAtwood上載咗一條片，片中嘅男女主角Roman Atwood同女主角Britni Williams好正經咁坐喺疏化，同Britni嘅媽咪話有要事宣布。起初Britni媽以為佢哋宣布婚訊，點知Roman竟話佢哋準備發行「Sex Tape」（性愛影帶）！Britni媽起初仲好言相勸，只係聽到已經完工兼質素唔錯，個不肖女甚至表示相信好多人都會鍾意時，佢即刻扯晒火。呢個時候Roman即刻拎出嚟畀Britni媽睇，至發現原來所謂「Sex Tape」其實係印有「Sex」字樣嘅「Tape」膠紙（Tape呢個字既可解做影帶，又可解做膠紙），Britni媽見狀即刻笑番晒。
如果日光日白兼喺大街大巷見到有男人露「巨鵰」，真係唔嬲就奇，只係呢隻喺挪威出現嘅超巨型大鵰，不但冇人想打佢，反而有唔少人對佢騎騎笑兼想摸吓佢添！話說呢個巨雕公仔先喺沙灘上作惡，用佢從頭頂噴出嘅大量金色紙片嚇人，跟住佢又騷擾河邊一對坐喺長櫈上嘅親暱情侶，最後更走去餐廳搞搞震。不過眾人見狀起初都幾驚訝，但後嚟個個都笑到見牙唔見眼，除咗因為佢嘅外形不但幾可愛，原來化身成巨鵰嘅19歲青年Philip van Eck，其實係幫挪威慈善團體RFSU，宣傳使用安全套嘅觀念，以免感染衣原體性病。據聞拍片當中被騷擾嘅約有30人，但絕大部分都覺得好玩，甚至同佢一齊合照。
打Pat Pat係愉虐玩法嘅一部分，只係究竟有幾受歡迎呢？英國一名57歲婦人Anna J Skye就話畀大家知，從事被打Pat工作嘅佢用咗年半嘅時間，就可以清還2萬英鎊（約24萬港元）嘅債務。原來喺佢年輕時由於不育，故此同老公決定用盡一切方法醫治，亦因此欠落巨債。及至老公過身後，佢為還債便決定從事被打Pat嘅工作，卻估唔到不但還清債務，甚至可以過住唔錯嘅生活。不過，佢強調從事呢份工18個月期間，共接觸咗30至40名陌生男性，卻從冇提供性服務。對呢份工作相當自豪嘅佢，最近更以幽默同感人嘅手法出版自傳《Out of the Red》。
撰文：魂