唔理大家信唔信相由心生呢個講法，只係喺現實中，一啲心地好嘅男女，總會散發出別樣嘅魅力，正如內地嫩模喬伊君咁，佢表示自己嘅靚係源自內心。有人卻唔係咁同意佢嘅講法，皆因縱然心地好令樣貌變得順眼，但好似佢咁玲瓏浮凸嘅身材，點睇都唔應該係同心地好或差有關。
先唔講佢嘅內心係咪咁善良同慈悲，單憑佢嘅外形就已經令人心跳加速。英文名叫做Joy嘅佢，雖然出生於湖南長沙，但卻識得講廣東話。作為2013年3月出道嘅模特兒嚟講，佢嘅發展確實頗為順利，只係大家咪以為佢不過係憑住激凸嘅上圍，同埋一副俏臉而成功喺芸芸嫩模中突圍而出，情況恰好相反。剛出道嘅佢並非以賣弄火辣身材，及拍攝露出度高嘅性感寫真，反而以斯文玉女形象示人，最多不過係露出少少事業線，呢種做法不但令佢成功定位，其後當推出性感寫真時，令佢有更大嘅吸引力同話題性。成功喺寫真界打響名堂後，同年開始進軍電影界，先後演出多套喜劇同運動題材電影。雖然電影並非A級製作，但已為佢未來嘅發展打好良好嘅基礎。
有別於其他曾經喺藝術學院修讀過課程嘅嫩模，佢嘅演技其實係自學番嚟，並且透過失敗之中學習。雖然經常遇到挫折，但卻練就佢實戰派嘅演技。此外，據佢透露早前開始進修歌唱技巧，希望為未來嘅發展裝備好自己。點解佢要咁努力進修呢？事關憑住佢嘅外形及純情嘅氣質，喺模特兒界一定會有佢嘅席位，未來絕對有機會成為炙手可熱嘅女神。不過佢卻唔係咁睇，因為覺得樣貌同身材都係天生，尤其係樣貌上，佢覺得自己不過因信仰屋企人自細教落「心慈則美」呢句說話，而令佢有今時今日迷人嘅樣貌，但總體嚟講一啲都冇付出過。為咗未來，佢希望能夠盡自己最大嘅努力。其實喺佢心目中，點樣解讀「心慈則美」呢？佢笑稱心慈嘅基本理念，就係包容人哋嘅缺點，發掘人哋嘅優點。
不論喬伊君嘅美貌係咪源自「心慈則美」，只係知道佢唔單止個樣夠索，身材更係冇得彈，縱然佢着住性感嘅內衣拍攝寫真，仍會令人有種唔夠喉嘅感覺。如果想知道、了解佢多啲嘅話，就要去佢個個人微博上睇吓喇！
網址：www.weibo.com/joyyan331
出生地：湖南長沙
身高：165cm
三圍：34、24、34
撰文：魂