大家接唔接受整容美女呢？如果接受唔到，點解唔少整容後嘅韓星咁受大家追捧呢？答案可能同坦白有關。如果坦言曾經整容，呢種坦率嘅態度總比明明整過容卻點都唔認嘅人好，好似內地人氣索模劉卓琳，正係當中一例子。
英文名叫Jolin嘅23歲索模劉卓琳，如果講佢出道前嘅經歷真係可以用曲折兩字嚟形容。喺海南島出生嘅佢，父母喺佢細個時已經離異，並一直跟隨母親生活。喺2009年5月中專畢業後，為咗尋找更好嘅生活及減輕母親嘅壓力，於是跟隨母親到東莞一間鞋廠工作。呢份每月2,200人民幣嘅工作一做就兩年幾。到咗2012年初，佢見到一份婚紗影樓嘅招聘學徒廣告，於是離開鞋廠轉做呢份僅得300人民幣月薪嘅工作。據佢憶述，呢段時間雖然辛苦兼且經濟拮据，但學到平面攝影及模特兒技巧，而從呢個時候佢開始接受整容。到咗同年6月，佢接受攝影師嘅建議開通微博，並以卓琳妹妹嘅藝名，喺網上以性感內衣模特兒身份，展現火辣身材之餘，更開始接受各種形式嘅攝影工作。
擁有性感迷人嘅外形嘅佢不但活躍於網絡，喺同一時間又參加奧運寶貝東莞賽區選拔賽，甫出場便以火辣內衣造型示人，並大膽宣稱「我要成名！」呢個決定成為佢人生嘅轉捩點！佢嘅名字瞬間紅遍網絡，模特兒工作量直線攀升，各種商業攝影活動亦蜂擁而至，並且做埋手機遊戲嘅代言人。呢個時候佢嘅收入，從月入最低300人民幣，爆升至月入超過兩萬，孝順嘅佢終於可以改善母親嘅生活，只係與此同時整容問題卻一直纏擾住佢。及至去年嘅一個網絡節目《你正常嗎？》，佢不但坦言曾經接受整容手術，並且從未回避過呢個問題，更大膽公開整容前後嘅樣。呢種大膽又坦率嘅舉動，不但冇因此影響佢嘅人氣，更獲得唔少讚美嘅聲音，認為佢夠晒坦白，最重要係勇於承擔自己嘅決定。
咪睇劉卓琳外形楚楚可憐，其實佢個性相當堅強，呢點可能同佢嘅心路歷程有關。不過呢啲都唔係重點，重點係佢勇於展現自己迷人嘅身材，配合文靜嘅氣質更係令人着迷。如果想知道佢最新近況，不妨去佢個微博睇吓。
網址：www.weibo.com/u/1967094135
出生地：海南島
身高：165cm
三圍：37、27、34
撰文：魂